Një grabitje e dhunshme në Dom të Klosit ishte lajmi i paradites së sotme, që zgjoi edhe strukturat e shtetit, me policinë që ndaloi 6 persona pasi lajmi për dhunimin e kryefamiljares dhe të birit të saj qarkulloi në media.
Detaje të reja janë zbardhur gjatë pasdites për grabitjen e armatosur që ndodhi gjatë natësm e cila shtyu edhe banorët e zonës të kërkojnë rikthimin e dënimit me pushkatim.
Sipas dëshmisë së familjarëve që ranë pre e grabitjes 5 grabitësit e maskuar rreth orës 02:00 pas mesnate kanë hyrë në banesën në pronësi të Përparim Lleshit përmes dritares së pasme të vilës 3-katëshe.
Pasi janë futur në banesë hajdutët kanë lidhur si fillim djalin e vogël të shtëpisë, që në ato momente ishte vetëm me nënën e moshuar, rreth 80 vjeçe.
Të dy nënë e bir janë dhunuar me qytën e automatikut në kokë, duke iu krijuar fraktura të shumta. Pasi kanë kontrolluar nëpër dhoma, autorët kanë gjetur 8 mijë euro, 1 milion lekë shqiptare dhe sende me vlerë, ndërkohë që nga jashtë mendohej se banesa ruhej nga persona të tjerë, dhe më pas të gjithë janë larguar në drejtim të rrugës kryesore që të çon në Klos.
Nga ngjarja në fjalë është terrorizuar i gjithë fshati, pasi sipas tyre nuk ka pasur të tilla episode në zonën e tyre. Aktualisht policia po vijon zbardhjen e ngjarjes dhe identifikimin e autorëve të grabitjes./BW
