Ka dalë “nul” aksioni i Shërbimit të Kontrollit të Brendshëm të Burgjeve, për arrestimin në muajin Prill 2022 të Ervis Zikës, që shërbente si drejtor i Burgut të Reçit në Shkodër.
Prokuroria e Shkodrës ka pushuar dosjen penale ndaj Ervis Zekës, duke e cilësuar ndërhyrjen për arrestimin e tij në krye të detyrës, si të pabazuar në prova dhe ligj.
Çështja e ngritur me shumë urgjencë dhe nxitimthi nga ministria e Drejtësisë, me pretendimet se në burgun e Reçit ishte vjedhur 150 litra naftë dhe se drejtori i burgut të Reçit Ervis Zika, fuste sende të palejuara në qelitë e të dënuarve, tashmë është mbyllur. Prokuroria e Shkodrës ka verifikuar se sasia prej 150 litra naftë e marë nga Ervis Zika përmes tollonave në një subjekt privat, është hedhur në makinën private te tij.
Ky fakt ka shërbyer në muajin prill për arrestimin e menjëhershëm të Drejtorit të komanduar Ervis Zika, që kishte vetëm 1 muaj e gjysëm në detyrë.
Ndërkohë vetëm pak orë pas arrestimit të tij, ministri i Drejtësisë, Ulsi Manja, urdhëroi komandimin e Drejtorit të ri të këtij burgu, Seit Vuçaj.
Gjatë hetimeve të kryera dhe marrjes në pyetje, Zika në asnjë moment nuk ka pranuar akuzat, duke pohuar se kishte qënë vetë ai që kishte denoncuar vjedhjen e karburantit në burgun e Reçit.
Në kallëzimin që Zika kishte paraqitur në prokurori para se të arrestohej, pretendonte një dëm financiar që lidhet me mungesën e 40 mijë litrave naftë në burgun e Reçit.
Kjo sasi është konsumuar në rrethana të mistershme, pasi burgu i Reçit nuk ka kryer aq shumë shërbime, për të konsumuar sasinë prej 40 mijë litra naftë. Dyshimet janë se karburanti është vjedhur dhe më pas shitur në treg. Kallëzimi ishte depozituar nga drejtori i komanduar, Ervis Zika, i cili vetëm pak ditë më pas u arrestua nga policia e burgjeve.
Ndërsa personat e kallëzuar në prokurorinë e Shkodrës, janë individë të tjerë të administratës dhe ish-drejtori i burgut të Reçit, për të cilët prokuroria e Shkodrës vijon të kryejë hetime.
