Gazetarja Ola Xama ka reaguar mbi lajmet e ditëve të fundit për sa i përket çmimeve të energjisë në vend.
Ajo thotë që çmimet në vend kanë qenë gjithmonë të trajtuar politikisht dhe asnjëherë sipas bilancit dhe shifrave të sektorit.
Qeveria emëron anëtarët e Bordit, dhe vendos sa do të jetë çmimi i prodhimit dhe në këtë mënyrë sipas Xama-s është e kotë të kërkojmë përgjegjësi te Enti Rregullator për çmimin e energjisë.
Postimi i Ola Xama-s:
Antarët e Entit Rregullator të Energjisë zgjidhen nga një ekip që përbëhet nga kryetari i Komisionit të Ekonomisë, kryetari i Komisionit të Veprimtarive Prodhuese dhe ministrit përgjegjës për energjinë, dhe i miratom Kuvendi- pra partia në pushtet.
Çmimin e energjisë për prodhuesin (KESH) që do t’i shitet Furnizuesit (OSHEE) e përcakton ministri përgjegjës për energjinë (Asambleja e Përgjithshme).
Në datën 16 shtator ministri përgjegjës miratoi që çmimi i shitjes së energjisë nga KESH te OSHEE për fashën e familjarëve që konsumojnë mbi 800 këh/muaj të jetë 34.3 lekë/këh.
OSHEE aplikoi pranë ERE për të miratuar tarifën e re duke llogaritur edhe kostot e transmetimit dhe ato administrative 8.65 lekë. ERE miratoi çmimin 42 lekë/këh.
Ligji i ri për energjinë elektrike i miratuar në vitin 2016 nuk solli asnjë pavarësi shtesë për organet drejtuese dhe që marrin vendime në sektorin e energjisë elektrike. Madje në rastin e çmimeve për konsumatorin fundor bëri hapa pas, duke mos ia lënë 100% ERE-s vendosjen e tarifave për konsumatorët dhe duke futur edhe qeverinë në vendimarrje.
Çmimi i energjisë në Shqipëri ka qënë gjithmonë i trajtuar politikisht dhe asnjëherë sipas bilancit dhe shifrave të sektorit. OSHEE në disa vite i ka patur kostot vjetore të operimit më të lira por nuk ka aplikuar për ulje tarife, dhe ERE ka lënë çmimin e lartë; dhe në disa vite ka patur arsye të kërkojë rritje çmimi por nuk ka kërkuar dhe as rregullatori nuk ka vepruar.
Pra është e kotë të kërkojmë përgjegjësi te Enti Rregullator për çmimin e energjisë. Çmimet në këtë vend i vendos qeveria. Ajo emëron anëtarët e Bordit, ajo vendos sa do të jetë çmimi i prodhimit. Na duhet të kemi për emër një Bord të Pavarur në këtë sektor që të mos na përjashtojnë si antarë te Komuniteti Evropian i Energjisë dhe të dukemi sikur zbatojmë direktivat europiane dhe kaq.
