Kryetari i PL, Ilir Meta ka postuar në rrjetet sociale një artikull me deklaratat e fizikanes Mimoza Hafizi, lidhur me satelitët shqiptarë që Edi Rama thotë se do të ngrejë në hapësirë.
Sipas saj, është e pajustifikuar që të shpenzohen 6 milionë euro për një satelit që mbi Shqipëri do të qëndrojë vetëm 1 minutë.
Meta këshillon lexuesit që të lexojnë fizikanen dhe jo Edi Ramën të cilin e quan ‘zhgarravitës’ të Rilindjes.
“Të dashur miq, ju lutem dëgjoni fizikanten e shquar dhe jo “zhgarravitësin” e Rilindjes!”, shkruan Meta në FB.
Deklaratat e Hafizit
Pedagogia Mimoza Hafizi tha se është jo efikase që të shpenzohen 6 milionë euro për satelitët.
E ftuar në emisionin “Good Morning Albanians” në Euronews Albania, Hafizi, teksa ka komentuar shërbimin satelitor që u prezantua ditën e djeshme nga kryeministri Ed Rama, theksoi se sateliti do të qëndrojë mbi Shqipëri vetëm 1 minutë.
“Besoj se bëhet fjalë për satelitët e zakonshëm që hidhen në lartësinë 400 apo 500 kilometra nga Toka, që quhet orbita e ulët e satelitit, dhe satelit i tillë për një orë e gjysmë do të bëjë një rrotullim të plotë të të gjithë perimetrit të trajektores ku është përcaktuar, dhe imagjinoni për një orë e gjysmë se sa do të qëndrojë sateliti mbi Shqipëri. Ai do qëndrojë vetëm 1 minutë. Është një objekt jo efikas. Kushton 6 milionë euro, dhe 6 milionë euro nuk e di nëse i kanë kontraktuar për një vit apo edhe për vitet tjera”, tha ajo.
