I ftuar në studion e emisionit “Me Xhaxhiun”, deputeti i PD-së Kreshnik Çollaku u shpreh pro hapjes së dosjeve të Sigurimit të Shtetit, duke shtuar se nëse një gjë e tillë nuk ndodh do të ishte akt kundër historisë.
Çollaku theksoi se është alarmante që 78 figura të larta rezultojnë funksionarë të Sigurimit të Shtetit dhe se këto shifra e çojnë vendin 32 vite mbrapa.
“I hapim të gjitha dosjet, nga i pari tek i fundit dhe sigurisht bashkë me to lustracionin. Projekti që kemi depozituar ne është i thjeshtë, dy nene ka, i qartë përveç atyre të raporteve me marrdhënie ndërkombëtare.
Hapje të gjithave, lustracion për të gjitha. Në rast se duam të bëjmë manovra mendoj që vetëm e ndot procesin, duket sikur do të shpëtosh dikë, por më shumë e akuzon dikë, kështu që është fare e thjeshtë. T’i hapim të gjitha, t’i pastrojmë të gjithë spiunët e Sigurimit të Shtetit. Unë pashë dje një shifër të tmerrshme nga Sulaj, 78 funksionarë të niveleve të larta , 32 vite mbrapa. A kuptoni se neve na kanë vjedhur dhjetorin e 90-ës? Fakti që këtu mbërrin 32 vite mbrapa, ne anëtarë të NATO-s, drejt BE-së dhe 72 figura të larta, funksionarë të sigurimit të shtetit?
Është katastrofë, është alarm. Duhet t’i hapim të gjitha sot. Është hera e parë në 32 vite që trashëgimtarja e partisë së punës, PS, bie dakort të hapë dosjet, të paktën kështu deklaron deri më sot. Rama do e përdorë politikisht kërkesën për hapjen e dosjeve. Mund të dali dhe që qeveria ,që nuk ndalet para asgjëje dhe të manipulojë dosjen e presidentit dhe kjo qeveri bie të nesërmen. Ne nuk e gjejmë dot këtë të drejtë duke bërë gjyqe me analizë nga panelet e mediave. Kjo gjë bëhet duke hapur dosjet , duke i parë letrat, mbase duke i çuar në gjykata dhe njëra nga dy palët bie, bie duke parë të vërtetën”-u shpreh Çollaku.
