Dy persona janë arrestuar këtë të Enjte nga Policia e Tiranës për prodhim dhe shitje narkotikësh.
Me finalizimin e operacionit të koduar policor “Tattoo” policia njofton se u arrestua A. B., 23 vjeç, banues në Tiranë dhe B. Sh., 33 vjeç, banues në Tiranë. Ky i fundit kishte thyer edhe masën e sigurisë “arrest në shtëpi.”
Sipas asaj që bën të ditur policia, 23-vjeçari administronte një qendër tatuazhesh, në rrugën “Sulejman Delvina”, në të cilën shpërndante edhe lëndë narkotike në bashkëpunim me 33-vjeçarin.
“Specialistët për Hetimin e Narkotikëve, pas informacioneve të marra në rrugë operative për dy shtetas, të cilët në bashkëpunim me njëri-tjetrin, shpërndanin lëndë narkotike kokainë, në një qendër tatuazhesh në rrugën “Sulejman Delvina”, kanë organizuar dhe finalizuar operacionin “Tattoo”, për kapjen e tyre. Si rezultat i operacionit u bë arrestimi në flagrancë i shtetasve:
– A. B., 23 vjeç, banues në Tiranë, për veprën penale “Prodhimi dhe shitja e narkotikëve”;
– B. Sh., 33 vjeç, banues në Tiranë, për veprat penale “Prodhimi dhe shitja e narkotikëve” dhe “Largimi i të burgosurit nga vendi i qëndrimit”. Nga verifikimet e kryera ka rezultuar se shtetasi A. B. administronte një qendër tatuazhesh, në rrugën “Sulejman Delvina”, në të cilën kryente edhe aktivitetin kriminal të shpërndarjes së lëndëve narkotike, në bashkëpunim me shtetasin B. Sh.”, njofton policia.
Gjatë kontrollit fizik të ushtruar ndaj tyre dhe kontrollit që iu bë qendrës, policia gjeti lëndë të dyshuar narkotike të llojit kokainë, të ndarë në doza, gati për shitje.
Pas verifikimeve të kryera ka rezultuar se 33-vjeçari B. Sh. kishte shkelur masën e sigurisë “Arrest në shtëpi”, për veprën penale “Drejtimi i automjeteve në mënyrë të parregullt”, duke dalë jashtë banesës.
Materialet i kaluan Prokurorisë, për veprime të mëtejshme procedurale.
