Autoriteti Kombëtar i Ushqimit konfirmoi këtë të Enjte se produktet e markës “Wudy” janë të sigurta për konsumatorët.
Drejtoresha e këtij institucioni tha se pas verifikimeve të kryera nga AKU, rezultoi se lotet e produkteve që kanë hyrë në tregun shqiptar nuk janë pjesë e atyre që kanë rezultuar problematike në stabilimentin e kompanisë prodhuese.
“Produktet që janë sot në tregun shqiptar janë të sigurta dhe të certifikuara”, u shpreh Jeta Dedja.
Njoftimi vjen pas një alarmi që përhapi institucioni gati një javë më parë, kur njoftoi se në produktet “Wudy” ishte konstatuar prani e “Listeria monocytogenes”, ndërsa bënte apel për mos konsumimin e salsiçeve.
Mjeku Ilir Alimehmeti ngre pikëpyetjet mbi profesionalizimin e Autoritetit Kombëtar të Ushqimit dhe trajtimin e rastit.
Në një reagim, ai e cilëson një lajm të mirë konfirmimin, edhe pse të vonuar, të AKU-së se “nuk kishte asnjë arsye për alarmin e krijuar mbi Listeria monocytogenes”.
Por, mjeku shton se AKU duhet të shpjegojë pse ngriti panikun në shkallë kombëtare përpara se të sigurohej a kishin hyrë ato lote malli në Shqipëri, apo jo.
Fakti, vijon më tej, rezulton që ato nuk kanë hyrë fare te ne.
Ai ndalet edhe te këshillat drejtuar qytetarëve nga drejtoresha e insticuinit në njoftimin paraprak të rastit, për tu vizituar te mjeku nëse kishin konsumuar “Wudy”.
“Drejtoresha duhet të shpjegojë se përse, duke mos qenë as profesioniste shëndetësore, u këshilloi qytetarëve të vizitoheshin te mjeku nëse kishin konsumuar produktin, pavarësisht nga fakti që këto lote nuk kishin hyrë fare në Shqipëri”, thotë mjeku Alimehmeti.
