Kryetari i Partisë së Lirisë, Ilir Meta u shpreh këtë të Enjte se nuk do të ketë kurrë bashkëpunim me Edi Ramën, për të cilin u shpreh se ka tradhtuar rëndë interesat kombëtare.
Në një emision televiziv, Meta tha se synimi i tij nuk është të marrë lidershipin e opozitës. “Qëllimi im është përmbushja e një misioni që jam thërritur, më ka thirrur 25 prilli”, deklaroi Meta.
Ai vlerësoi kreun e PD-së Sali Berisha, të cilin e krahasoi me Kristiano Ronaldon. “Mosha nuk është tregues për energjitë”, tha.
Nismën e fundit të qeverisë për ndërtimet pa leje, e cilësoi një show.
“Edi Rama ka 10 vite kryeministër. Sa herë vijnë zgjedhjet bëhen kërcënime për prishje. Të gjitha ndërtimet që janë lejuar të ndërtohen pa leje janë bërë me lejen e tij. Edi Rama sheh një kotec pa leje në Vlorë dhe e çon të moshuarën para drejtësisë, bën sikur nuk i shikon të gjitha katet pa leje të kullave në mes të Tiranës. Askush nuk e beson më. Jemi në kuadrin e një show”, tha Meta.
Kreu i PL-së deklaroi se do të bashkëpunojë me të gjithë faktorët që janë në opozitë që nuk duan të jenë peng të një shteti që nuk ekziston.
Më tej, lëshoi akuza të tjera ndaj Ramës: “Këtu është rrëzuar siguria juridike, këtu nuk ekziston shteti i së drejtës. Shqipëria është në kushtet ku fëmijët dalin në protestë për të drejtën e tyre. Dua që të mos qajnë ato fëmijët aty për çmenduritë e Edi Ramës”, tha Meta, duke iu referuar protestës për mbylljen e kopshtit të “Turgut Ozal”.
Ai theksoi se “Rama ka tutor përfaqësues të krimit të organizuar, brenda dhe jashtë vendit, ka ata që e detyrojnë të bëjnë veprime kundër interesit publik”.
Lidhur me zgjedhjet lokale që po afrojnë, Meta tha se situata i imponon opozitës të dalë me një kandidat të përbashkët. “I gatshëm 100% të mbështes një kandidaturë të PD për Tiranën, vetëm të jetë një kandidaturë përfaqësues”, tha Meta.
Ai shtoi opozita ka shumë mundësi për të fituar, por i duhet organizim dhe impenjim për të vrarë frikën.
