Nga Boldnews.al
Binomi Balluku – Berberi, e para zv.kryeministre dhe ministre Infrastrukture dhe i dyti kreu i Autoritetit Rrugor Shqiptar, janë bërë “të rrezikshëm” për financat publike. Ata kanë akorduar para shtesë për rrugën e Sarandës, rrugën e Arbrit apo koncesionet e rrugës nga Miloti në Fier.
Por, së fundmi, kanë filluar të lëshojnë dorën edhe për një nga projektet më të rëndësishëm, zgjerimin e rrugës Elbasan – Qafë Thanë. Ata trumbetuan me të madhe se do të investojnë në këtë segment, i bërë që në kohën e Nanos. Synimi i tyre ishte zgjerimi i pjesëve më të vështira, të cilat janë nga hyrja e Librazhdit e deri në Përrenjas, pasi Qafë Thana është zgjeruar. Por, shiko se çfarë bëjnë Balluku-Berberi!
Sipas dokumenteve që disponon BoldNews.al, Autoriteti Rrugor Shqiptar ka hapur tenderin “zgjerimi i rrugës Elbasan- Qafë Thanë, (faza 1)”. Fondi limit i këtij tenderi është plot 2.499.999.989 lekë pa TVSH, ose me TVSH rreth 25 milionë euro. Një shumë e konsiderueshme, por kur bën fjalë për atë rrugë, ndoshta ia vlen barra qiranë për të shpenzuar këto para’. Në dokumente thuhet se kohëzgjatja e kontratës ose afati kohor për ekzekutimin është 18 muaj. Por, a bëhet fjalë për të gjithë segmentin?!
BoldNews.al shfletoi dokumentet e këtij tenderi, ku thuhet se “rruga kombëtare Elbasan – Qafe Thanë është pjesë e korridorit Tiranë-Elbasan-Librazhd-Pogradec-Korçë, që lidh zona me shumë rëndësi në drejtim të turizmit, por edhe të lidhjes së shtetit tonë me Greqinë, Maqedoninë dhe Bullgarinë, etj”. Një fjali “me mënd”, pasi zona në fjalë ka potenciale të mëdha për ekonominë e vendit për shkak të resurseve të mëdha natyrore që kanë.
“Për këtë arsye trafiku në këtë segment rrugor arrin kulmin sidomos përgjatë periudhës së dimrit dhe verës, duke qenë se përveç trafikut lokal shtohet ndjeshëm numri i mjeteve të turistëve të ndryshëm që frekuentojnë këto zona” thotë ARRSH. Nga analizat e Autoritetit është vënë re se përgjatë këtij segmenti rrugor konstatohet një gjendje jo e mirë e parametrave teknik rrugor. Mësohet se gjatësi totale e projektit është 50.12 km.
Në dokumente, ARRSH shkruan se “ky segment nis në afërsi të pas daljes nga fshati Labinot-Fushë në km 1+400 dhe përfundon në afërsi të fshatit Mirakë në km 6+500”. “Bazuar në vendimin e këshillit pas dorëzimit të fazës së Projekt-Idesë, projekt-zbatimi i këtij segmenti prej 5.060ml është bërë në përputhje me parametrat teknikë të rrugëve të kategorisë B (rrugë interubane kryesore)” thotë ARRSH, për ndërhyrjen në vetëm 5 kilometër rrugë.
BoldNews.al bëri një vëzhgim të segmentit ku do të investohet. Siç shihet edhe nga fotot, terreni është mjaft i favorshëm, pasi i gjithë ky aks është fushor. Madje, edhe gjurma e re që do të ndërtohet është fushore, në afërsi të shinave të trenit të linjës Elbasan-Pogradec. Kjo rrugë është e drejtë dhe nuk ka kthesa, ndërsa pjesa ekzistuese ka asfalt të mirë dhe është në afërsi të lumit Shkumbin. Por, pavarësisht se janë vetëm 5 kilometra, ARRSH-ja ka akorduar plot 25 milionë, ose 5 milionë euro për 1 kilometër rruge e kategorisë B.
