Pasi i zbuloi tre kate pa leje në një godinë në Farkë dhe i prishi imazhin publik duke e ndarë këtë shkelje me median, tashmë kabineti Rama po mundohet të shlyejë gabimin, duke I dhuruar miliarda lekë të qytetarëve, kompanisë së Pëllumb Salillarit. Fondi Shqiptar i Zhvillimit ka shpallur këtë të hënë kompaninë e Pëllumb Salillarit fitues të tenderit për rijetëzimin e Kalasë së Tepelenës. Fondi i vendosur në dispozicion për këtë tender ishte 5.4 miliardë lekë të vjetra. Subjekti “Salillari” e ka fituar procedurën me ofertën prej 4.58 miliardë lekë të vjetra. Nëpërmjet këtij tenderi, Fondi Shqiptar i Zhvillimit thotë se do të përmirësojë punimet e kryera keq nga stafi i Ali Pashë Tepelenës.
Gjendja e monumentit nuk është e mirë, pasi materiali lidhës i gurëve, llaçi i gëlqeres nuk ka qenë i cilësisë së lartë në kohën e ndërtimit. Një nga arsyet e kësaj dobësie është dhe puna e nxituar që shoqëroi ndërtimin e këtyre fortesave. Kjo dukuri vihet re më qartë në ndërtimet e brendshme ku muratura e tyre është shkërmoqur dhe është në degradim të vazhdueshëm, thuhet në dokumentat e tenderit.
Pasi ka zbuluar gabimet e rënda të Ali Pashë Tepelenës, institucioni i drejtuar nga Dritan Agolli, ka vendosur që, 200 vjet pas ndërtimit të kalasë, t’i japë Salillarit rreth 5 miliardë lekë të vjetra për rijetëzimin e saj. Pak ditë më parë, shoqëria e ndërtimit në pronësi të Pëllumb Salillarit, fitoi një tjetër tender, kësaj radhe pa garë, me fond 2.5 milionë euro, për thellimin e basenit të Triportit, në Vlorë, ku do të ankorohen anijet nga Bangladeshi, të cilat do të prodhojnë energji elektrike. Në fillim të Shtatorit, Pëllumb Salillari u kap në shkelje flagrante të ligjit, pasi kishte ndërtuar 3 kate pa leje, në një sipërfaqe 1200 metra katrorë, në një pallat në zonën luksoze të Farkës, në Tiranë. Vepra penale e kryer nga Salillari shoqërohet me arrestim. Por, institucionet shtetërore e toleruan, duke i ofruar që të zgjedhë mes alternativave për ta dhuruar ose parablerë katet pa leje.
/Syri.net/
