Ish-Ministri i Jashtëm i Shqipërisë, deputeti i PD-së Tritan Shehu e ka përshëndetur fitoren në zgjedhje në Itali, të partisë “Vëllezërit e Italisë” me kryeministre të ardhshme kreun e saj, Giorgia Meloni.
“Fitorja e koalicionit të djathtë është një eveniment i rëndësishëm për Italinë, Europën dhe vendin tonë – shprehet Tritan Shehu duke publikuar edhe fotografi nga takimet që ka pasur me Melonin gjatë fushatës. – Tashmë që qartësisht është konfiguruar kjo fitore, Italia duhet uruar!
Urimet më të mira Melonit si kryeministre e ardhshme dhe “ Fratelli d’Italia”! Urimet më të mira Berlusconit e Salvinit me “Forza Italia” dhe “Lega”! Një ndryshim ky shumë i rëndësishëm pozitiv jo vetëm për atë vend, partner yni strategjik, por për shumë më gjerë.
Shumë i rëndësishëm ky ndryshim edhe për rajonin tonë ku interesi e roli i Italisë mike për stabilitetin, rrugën tonë perëndimore e integrimin europian, do të marrë një forcim e rritje të konsiderueshme, elemente këto të përputhshme me aspiratat tona jetike. Dhe një herë urimet më të mira Qeverise së re të Italisë e personalisht Melonit!” përfundon Tritan Shehu.
