Sekretari organizativ në PL, Endrit Braimllari foli sot në studion e “Fax News” lidhur me mbylljen e shkollës “Mehmet Akif” me vendim qeverie, duke e cilësuar një vendim krejtësisht për interesa personale të Ramës.
“Mbyllja e shkollës “Mehmet Akif” me vendim qeverie është totalisht në interesa personalë të Ramës, nuk i shërben arsimit dhe zhvillimit të tij. Ky kolegj prej 1994 ka qenë në vend dhe ka nxjerrë breza pafund që i shërbejnë shoqërisë, madje brenda kabinetit dhe administratës së tij ka persona që kanë dalë nga ai kolegj. Mbyll një shkollë e nga ana tjetër hap vende pune për strukturat kriminale, Edi Rama i ka të qarta filozofitë e tij politike. Unë do jem në protestën që do zhvillohet nga pedagogët, pasi kjo qeveri ka rënduar direkt mbi çështjet e tyre”-tha Braimllari.
Lidhur më aksionin opozitar të PL-së, Braimllari u shpreh se po zhvillohen çdo ditë bisedime për protesta dhe se kjo forcë politike është në rrugën e duhur.
“Protesta e mbajtur te Inceneratori i Tiranës nuk ishte miting partie por për të treguar që aty nuk ka incinerator, por vetëm bar dhe disa rrjeta teli.
E kemi thënë dhe më parë që e gjithë Shqipëria është në protestë, ne kemi bërë denoncime për shkollat që nuk kanë nisur mësimin. Ne nuk i referohemi shtatorit sepse ka nisur aktiviteti politik i mazhorancës sepse ne në aksion kemi qenë gjithë verën. Partia jonë ka misionin të shpëtojë vendin nga kthetrat e Ramës dhe Veliajt. Do kemi një rakordim me PD-në, ne dimë qartë rolin e opozitës“-përfundoi ai.
