Në zgjedhjet e përgjithshme që u zhvilluan ditën e sotme, pothuajse 51 milionë italianëve me të drejtë vote u është bërë thirrje për t’u drejtuar kutive, në mënyrë që të vendosin për fatin e vendit dhe stabilitetin në katër vitet e ardhshme, mes shumë ndryshimeve në ligjin elektoral të vendit.
Mediat italiane raportojnë se në zgjedhje deri në orën 19.00 votuan 51.16% e atyre që kishin të drejtë vote, në shifrat e Ministrisë së Brendshme që i referohen gjithsej 7904 qëndrave të votimit.
Duke i krahasuar shifrat me zgjedhjet e fundit politike të vitit 2018, pjesëmarrja rezulton të jetë më e ulët pasi asokohe kanë votuar 58.40% e qytetarëve.
Ndër rajonet me pjesëmarrjen më të lartë, megjithëse gjithmonë më të ulët në krahasim me zgjedhjet e fundit, janë: Lombardia (58,81% kundrejt 62,81); Toskana (58,07% kundrejt 63,87%); Emilia Romagna (59.80% kundrejt 66.98%); Lacio (53.18 kundrejt 54.47).
Ndër ato me pjesëmarrje më të ulët janë: Basilicata (41,27% kundrejt 53,13%); Campania (38.72% kundrejt 52.52%); Molise (44,04% kundrejt 56,46%); Kalabria (36.92% kundrejt 49.64%) dhe Sardenja (40.48% kundrejt 52.20%).
Ndërkohë, shifra përfundimtare e pjesëmarrjes do të publikohet pas orës 23:00.
Ndërkohë, sytë e botës, jo vetëm të vendeve evropiane, janë përqendruar te rezultati i këtyre zgjedhjeve, të cilat po zhvillohen në mes të një krize ndërkombëtare ekonomike të paprecedentë.
