Meteorologu Hakil Osmani bëri parashikimin e motit për këtë javë ku theksoi se fillimi i javës do të nisë me mbizotërimin e motit të paqëndrueshëm.
Sipas tij, në fillim të javës do të kemi momente të izoluara shiu, kryesisht në zonat veriore dhe në orët e mesditës, duke nisur gradualisht që reshjet të bëhen më të dendura në të gjithë territorin shqiptar.
“Më të dukshme reshjet pritet të jenë gjatë orëve të mbrëmjes së ditës së sotme dhe mëngjesin e ditës së martë, kryesisht në zonat veriore, ndërsa në zonat qendrore dhe jugore reshjet do të jenë në sasi më të pakta,” tha Osmani.
Ndërkohë, duke filluar nga mesdita e ditës së martë dhe në vijim, do të kemi një përmirësim të kushteve të motit, duke bërë që dita e enjte dhe e premte të jenë nën mbizotërimin e motit të qëndrueshëm.
“Në të gjithë territorin gjatë javës do të ketë alternime kthjellimesh dhe vranësirash. Fundjava ka mundësi të ketë vranësira më të shpeshta, çka do të bëjë që ditën e diel të kemi reshje shiu më të pranishme. Nga dita e mërkurë e në vijim kemi rritje graduale të temperaturave, me maksimumet që do të arrijnë 21-22 gradë Celsius, ndërsa dita e diel do të sjellë një rënie, kryesisht në orët e mesditës,” u shpreh Osmani për Euronews Albania.
Për sa i përket rajonit, në fillim të kësaj jave do të mbizotërojnë kushte të paqëndrueshme me prani reshjesh shiu. Mesjava sjell mot të qëndrueshëm, ndërsa në fundjavë do të ketë sërish reshje, kryesisht të dielën.
