Bruno Telushi ka folur për mediet para ndeshjes së Partizanit me Kukësin që do të zhvillohet të hënën e javës së ardhshme. Mesfushori vlonjat ka analizuar situatën tek të kuqtë duke treguar gjendjen e ekipit kryqytetas.
Një çështje e rëndësishme ka qenë edhe humbja e parë në kampionat me Erzenin. Në intervistën e dhënë për mediet, lojtari i Partizanit ka thënë:
“Vijmë pas një ecurie të mirë, pavarësisht ndeshjes së fundit që kemi humbur. Ndeshjet e ardhshme duhet të tregojmë vlerat tona, të tregojmë se dimë të reagojmë pas humbjes dhe të vazhdojmë të qëndrojmë në vendin e parë në klasifikim.
Humbja ndaj Erzenit- Kemi parë disa momente nga ajo ndeshje, e kemi diskutuar dhe me njëri-tjetrin ne çunat, presim për ta bërë analizën e asaj ndeshjeje. Mendoj se bëmë një lojë të mirë pavarësisht rezultatit. Dihet tashmë që në futboll janë të mundshme të gjithë rezultatet. E rëndësishme është që ne bëmë një ndeshje të mirë dhe kjo humbje na bën mirë për të na ulur me këmbë në tokë. Nuk e kemi marrë lehtë, sepse po ta kishim bërë këtë, nuk do të shkonte ashtu mënyra se si luajtëm, mund të them edhe çështje fati për ato raste që humbëm, por ky është futbolli dhe ndodh.
Kalendari i vështirë- Kalendarin nuk e shohim aspak. Çdo ndeshje të radhës e konsiderojmë ndeshje të fortë. E vlerësojmë 100% për të arritur fitoren. Nuk na tremb fare kalendari. Që nga ndeshja që do të luajmë tani është e radhës dhe do të japim maksimumin, kaq.
Impakti i humbjesndaj Erzenit- Nuk jemi tronditur aspak, kemi bërë tri ndeshje të mira, një e kemi humbur dhe tri të tjerat i kemi fituar. Është rezultat negativ në ndeshjen e fundit, por loja ishte e mirë. Nuk po them se jemi të kënaqur nga kjo, sepse normalisht që humbja na ka mërzitur, humbja ndonjëherë të bën të punosh më fort për më tej.
Skuadra nën drejtimin e Kolelës- Trajneri Kolela po bën një punë të mirë, unë dua të falënderoj edhe profesor Tanin, që tashmë nuk është më pjesë e klubit. Me ardhjen e Kolelës grupi është goxha i mbledhur dhe pozitiv. Gjithsecili jep maksimumin, jemi shumë të qetë te kjo pjesë. Kolela na jep shumë qetësi dhe të vazhdojmë përpara.
Sfida ndaj Kukësit – Unë mendoj se Kukësi është një ekip i mirë, pavarësisht klasifikimit, sepse është nisja e kampionatit. Ne e vlerësojmë dhe do të shkojmë për të dhënë maksimumin.
Favoriti për titullin kampion- Partizani luftën e ka me veten, favorit ka shumë ekipe, nuk dua t’i përmend fare, por nëse ne do të zvogëlojmë problemet tona, mendoj se do të na bëhet më e lehtë rruga për te titulli.
Kompleksi i Partizanit– Na ndihmon jashtëzakonisht shumë, sepse më në fund jemi në shtëpi. Më parë kemi qenë pak të lëvizur sa këtej, sa andej, për të gjetur terrene. Tani jemi në shtëpinë tonë, na jep tjetër ndjesi dhe ndihemi shumë rehat për këtë. Patjetër do të na ndihmojë edhe në ecurinë në kampionat.
