Nga Boldnews.al
Në datën 13 gusht 2022, BoldNews.al publikoi një investigim për tenderin 130 mijë euro për trajtimin kozmetik të punonjëseve femra në OST. Kreu i këtij operatori, Skerdi Drenova, kërkonte sigurimin në jetë të punonjëseve, ndërsa shkruante në dokumentet e tenderit se “trajtim kozmetik për qëllime të kësaj kontrate nënkupton çdo trajtim mjekësor që kryhet vetëm për të ndryshuar pamjen e jashtme dhe jo me qëllim trajtimi dhe shërimi të një gjendje shëndetësore”. Pra, për qëllime estetike!
Ndërkohë, pas publikimit, pati një mori denoncimesh për këtë tender, por disa “kokrra” filluan që të mbronin “mikun” e tyre, Skerdi Drenova. Një ndër to ishte zonja Irena Beqiraj. Në datën 14 gusht, Irena që dikur ka mbajtur poste të rëndësishme në Doganën Shqiptare apo në Ministrinë e Financave, bëri një status në rrjetin social “facebook”.
Këtë status, zonja e quajti; “Mëkati i “Skerdit të OST-së”! Në brendësi, analizoi se “trajtimi kozmetik jo për qëllime shëndetësore” shkruhej në kontrata standarde të sigurimit të jetës dhe shëndetit. “Pra është një gjuhë standarde kontraktuale e policës së sigurimit, ku trajtim kozmetik quhet çdo ndërhyrje për rregullimin e dëmtimeve që mund të pësojë individi në pamjen e jashtme, pra që nuk mjekon, edhe gjendet në çdo kontratë sigurimi të jetës edhe shëndetit (më poshtë keni një model)” shkruan zonja në fjalë. Në këtë status, zonja ka publikuar një kontrate sigurimi të kompanisë “SICRED”, madje e ka publikuar të gjithën, me çfarë përmban kjo kontratë. Më vonë, të njëjtën kontratë e ka publikuar OST në Agjencinë e Prokurimit Publik, por duke i hequr logon e kompanisë “SICRED”. Zonja Beqiraj shkruan se “mëkati i Skerdit është se po blen kontrata sigurimi standarde, pra po u siguron jetën edhe shëndetin e punonjësve”. Madje, ajo thotë se ky “mëkat” duhet të pasohet edhe nga kompanitë e tjera, madje do të duheshin 10 sekonda për të gjetur këto kontrata. Në fund, e mbyllte me fjalinë “mos qeshni me Skerdin e OST-së, por qani për paditurinë enorme që na ka zënë sytë!”.
Natyrisht, duke qenë se zonja Beqiraj ka mbajtur poste të larta, në institucionet “me lekë” që ka drejtuar, mund të ketë pasur informacion më shumë për të tilla procedura. Apo, mund të ketë pasur shumë dijeni edhe për paracaktimin e tenderëve.
Por, shikoni se çfarë ka ndodhur! Zonja Beqiraj, me dashje apo pa dashje, ka zbuluar një tjetër “mëkat” të Skerdit të OST-së. Pra, paracaktimin e fituesit të këtij tenderi. Në datën 14 gusht 2022, zonja e institucioneve “me lekë”, publikoi kontratën e kompanisë “SICRED”, ku ishte shkruar edhe trajtimi kozmetik. Ndërkohë, në datën 8 shtator 2022, titullari i OST-së, Skerdi Drenova, ka shpallur fituesin e këtij tenderi. Dhe, gjejeni se cila firmë e fitoi tenderin?! Firma “SICRED”! Të jetë rastësi? Apo zonja Beqiraj ka pasur informacion se cila do të fitonte këtë tender?! Natyrisht, ajo e mbrojti z.Drenova, duke dalë edhe publikisht. Por, i gjeti edhe një tjetër “mëkat”, atë të paracaktimit të fituesit. Sipas dokumenteve që disponon BoldNews.al, shpallja e fituesit është bërë para disa ditësh, ku “SICRED” ka qenë BOE me “SIGAL”. Ato kanë ofruar 13.286600 lekë, nga 13.290.728 lekë që ka qenë edhe fondi limit. Oferta e BOE-s ka qenë e vetme, duke lënë rrugës vetëm disa qindarka.
