24 orë pas sulmit, sistemi TIMS është rikthyer në pikën kufitare të Kapshticës.
Duke iu referuar informacioneve nga autoritetet doganore bëhet e ditur se aktualisht në pikën e kalimit kufitar të Kapshticës ka sistem, por është i ngadalshëm ndërsa sa i përket situatës së automjeteve në këtë pikë është normale.
Ndërkohë, gjendja vazhdon të jetë e bllokuar sistemi në pikën doganore të Qafë Thanës dhe po punohet për rikthimin e tij në gjendje normale.
Përmes faqes HomelandJustice, hakerat e Iranit kanë publikuar video 6 minuta të gjatë ku shfaqet sistemi SMART PSS, i kontrollit qendror i të gjitha pikave të kalimit kufitar në Republikën e Shqipërisë. “Numerim mbrapsht i Tiranës drejt katastrofës ka filluar”, ishte mesaqzhi që hakerat iranianë publikuannë faqen e tyre Homelandjustice, si kërcënim për vendin tonë.
Kujtojmë se më 9 shtator sistemi TIMS u godit nga një sulm kibernetik pas të cilit autoritetet qeveritare dhe kryeministri Edi Rama thanë se fshihej Irani. Me efekt të menjëhershëm Shqipëria ka ndërprerë marrëdhëniet diplomatike me Republikën Islamike të Iranit. Gjithashtu edhe SHBA-ja ka bërë përgjegjëse Iranin.
