Edhe këtë vit emigrantë të shumtë kanë zgjedhur ta festojnë Pashkën Ortodokse me familjarët e tyre në vendin tonë.
Kjo ka sjellë fluks të lëvizjeve në pikën kufitare të Kapshticës. Sipas të dhënave, vetëm në 24 orët e fundit kanë hyrë në vendin tonë nga Greqia rreth 7,500 qytetarë, ndërsa kanë udhëtuar drejt shtetit fqinj mbi 2,700 persona.
Pavarësisht shtimit të lëvizjeve, nuk ka pasur radhë pritjeje, pasi pala shqiptare ka punuar me 3 sportele në hyrje dhe 3 në dalje, ndërsa autoritetet greke funksionojnë me 3 sportele në dalje.
Sipas të dhënave, gjatë kësaj jave kanë ardhur nga Greqia në vendin tonë rreth 30 mijë pasagjerë. Autoritetet kanë marrë të gjitha masat për të menaxhuar fluksin me shtim të kapaciteteve për përpunimin e të dhënave për emigrantët gjatë kësaj periudhe festive.
