Kryetari i Partisë së Lirisë, Ilir Meta përmes një statusi në rrjetin e tij social fb, fton qytetarët në protestën e 13 shtatorit në orën 18:00, te inceneratori i Tiranës.
Meta shkruan se çdo ditë grabiten miliona euro të taksapaguesve shqiptarë, ndërsa shton se koha nuk pret më dhe shqiptarët do të protestojnë te vendi i krimit ditën e martë.
“Vetëm lufta e hapur kundër kapjes së shtetit dhe korrupsionit parandalon falimentimin e Shqipërisë. Koha nuk pret më! Të gjithë në protestë më 13 shtator, ora 18:00, tek inceneratori i Tiranës!”, shkruan Ilir Meta.
Postimi
Miliona euro të taksapaguesve shqiptarë grabiten çdo ditë nga mafia e inceneratorëve me firma të falsifikuara të qytetarëve, që janë ndarë nga kjo botë prej vitesh, me firma pensionistësh që jetojnë në azile dhe me firma çobanësh që mbajnë dhen në Greqi. Si mund të vazhdojë kjo aferë kur inceneratorë nuk ka por Qeveria vazhdon paguan pronarët e shpallur në kërkim? Dihet shumë mirë që këto para shkojnë vetëm për krimin. Vetëm lufta e hapur kundër kapjes së shtetit dhe korrupsionit parandalon falimentimin e Shqipërisë. Koha nuk pret më! Të gjithë në protestë më 13 shtator, ora 18:00, tek inceneratori i Tiranës!
