Një efektiv policie është arrestuar në Pogradec pasi ka shkelur masën e sigurisë “arrest shtëpie”.
Enea Qose, 24 vjeç u arrestua nga sektori i Hetimit të AMP-së Korçë, në bashkëpunim me Komisariatin e Policisë Pogradec për veprën penale “Largimi i të burgosurit nga vendi i qëndrimit”.
“Në datë 08.09.2022, rreth orës 22:30, ky punonjës policie (i pezulluar dhe nën hetim me masën e sigurimit personal të ‘Arrestit në shtëpi’) është kapur në flagrancë në ambientet e një biznesi Bar Kafe në lagjen Nr. 4 Pogradec, duke thyer masën e ‘Arrestit të shtëpisë’ të vendosur nga Gjykata e Shkallës së Parë Pogradec, në kuadër të procedimit penal nr.163, viti 2022 (në hetim). Ky procedim penal është regjistruar mbi materialin referues të dërguar nga AMP Korçë, pasi më datë 18.05.2022 ai është ndaluar me iniciativë nga oficerët e policisë gjyqësore të AMP-së, si i dyshuar për veprat penale ‘Vjedhja e kryer duke shpërdoruar detyrën’ dhe ‘Falsifikimi i dokumentave’”, njofton AMP.
Në maj të këtij viti, polici u arrestua me akuzën se shpërdoroi detyrën duke marrë ryshfet nga një shtetas kosovar, ndërkohë që nga gjykata u vendos që Qose të gjykohej në “arrest shtëpie”.
