Mbretëresha Elizabeth II ndërroi jetë një ditë më parë në moshën 96-vjeçare. Monarkja, e cila zhyti në zi Britaninë e Madhe me vdekjen e saj, ka lënë gjurmët e saj.
Mbretëresha Elizabeth, në paraqitjet e saj ka preferuar linjat klasike dhe të pastra, duke mbetur gjithmonë elegante dhe me stil. Ajo ka veshur të gjitha ngjyrat e ylberit në daljet e saj publike, në 70 vite në krye të detyrës.
Biografi i Pallatit Mbretëror, Robert Hardman, ka treguar se ajo vishej qëllimisht me ngjyra të ndezura që të binte në sy gjatë eventeve mbretërore.
Gjatësia nuk e favorizonte Mbretëreshën Elizabeth, ndaj ajo kishte zgjedhur ngjyrat që të tërhiqte vëmendje dhe të gjithë ta dallonin lehtë ku ndodhej.
Në biografinë që i shkroi në vitin 2011, “Our Queen”, Hardman s’la pa përmendur këtë citim që i mbeti në mendje nga Mbretëresha: “Nëse do të vishja ngjyrën bezhë, askush s’do ta dinte kush jam”.