Një aksident me vdekje ka ndodhur këtë të Premte në aksin Korçë-Pogradec, ku një 65-vjeçar ka humbur jetën. Ky i fundit ishte duke lëvizur me biçikletë që është përplasur nga një automjet.
“Rreth orës 14:55, në aksin rrugor Korçë-Pogradec, pranë fshatit Libonik, Maliq, shtetasi A. P., duke drejtuar mjetin tip ‘Ford’ ka përplasur biçiklistin N.S., 65 vjeç, banues në fshatin Symiz, Maliq, i cili u dërgua në spitalin e Korçës, ku ka ndërruar jetë”, njoftoi policia.
Me drejtuesin e mjetit po kryen veprimet e mëtejshme procedurale, ndërsa grupi hetimor po punon për të sqaruar rrethanat dhe përcaktuar shkaqet e aksidentit, shtuan të njëjtat burime.