Deputetja e Partisë Demokratike, Flutura Açka ka reaguar ditën e sotme për aksionin që qeveria ka marrë për konfiskimin e kateve pa leje në pallate.
“A keni ndonjë fije turpi?! Po sekuestroni godina shumëkatëshe pa lejë? Po kush i lejoi këto godina të ndërtohen? Ju!”, shkruan deputetja e revoltuar.
Açka e cilëson këtë vendim si një aksion gjobëvënieje për të mbushur arkën e shtetit.
“Ky është një aksion i pastër gjobëvënieje për të mbushur arkën e shtetit dhe për të hequr vëmendjen nga rritja e çmimit të energjisë me të cilin i gjobitët dje shqiptarët. Sa kohë nuk ka të ndëshkuar për këto shkelje dhe dorëheqjet tuaja, kjo është vetëm kozmetikë. Kështu e nisët pushtetin, duke sekuestruar ikona, gjysmat e të cileve tani një zot e di ku janë. Uzurpimi pas shpine, brutaliteti fashist pa kurrfarë shqyrtimi të rregullave dhe ndërgjegjjes, është domeni juaj i pushtetit. Aty jemi në substancën tuaj dhe të parëve tuaj. Doni t’iu shërbeni shqiptarëve? Çlironi edhe rrugicat e qyteteve nga kioskat e patronazhistëve tuaj”, përfundon reagimi në FB i deputetes demokrate.
