“BE ka një rezolutë të BE-së në të cilën deklarohet se asnjë vendim i tillë nuk mund të merret pa asnjë proces gjyqësor”
Kështu u shpreh kreu i PD-së Sali Berisha teksa u pyet nga gazetarët për deklaratën e Taulant Ballës se Bashkimi Europian do ta shpallë non-grata.
“Nuk ka asnjë informacion të tillë. BE ka një rezolutë të BE-së në të cilën deklarohet se asnjë vendim i tillë nuk mund të merret pa asnjë proces gjyqësor, por duhet të jem i qartë, asgjë në botë nuk do mundet të ndalojë këtë projekt. Ky trend është i pandalshëm, sado të lobojë Rama, sado miliona të shpenzojë, kjo lokomotive do të nxjerrë atë nga pushteti”, u shpreh kreu i PD-së në një konferencë për mediat.
Një ditë më parë, kreu i grupit parlamentar të PS-së, Taulant Balla hodhi akuza ndaj kreut të PD, Sali Berisha se ka bërë gjithçka kundër interesave të Shqipërisë.
Në fjalën e tij nga foltorja e Kuvendit, Balla e cilësoi të turpshme që Berisha të jetë në Kuvend ndërsa paralajmëroi se Sali Berisha do të shpallet non grata edhe nga Bashkimi Europian.
“Është për turpin e këtij kuvendi që një “non grata” të shpallur nga SHBA, dhe Britania e Madhe dhe mos u habisni edhe nga BE, vijon të livadhisë i qetë”, tha Balla.
