Kryeministri Edi Rama ishte kritik me dhomat e biznesit duke i akuzuar ata se raportet kritike mbi klimën e biznesit i hartojnë mbi bazën e anketave fiktive të cilat nuk paraqesin realitetin i cili ka ndryshuar si “dita me natën”.
Dhoma Amerikane e Tregtisë dhe ajo e Gjermanisë kanë bërë raporte kritike ndaj klimës së biznesit.
“Është e pamundur të jemi pre e anketave të bëra në mënyrë jo profesionale që faktikisht cënojnë punën tonë të përbashkët, imazhin e këtij vendi dhe vetë klimën e biznesit vetvetiu. Është e pamundur. Nuk mund të jemi pre e opinioneve të mbledhura rrugëve, opinioneve të mbledhura në mënyrë kaotike dhe e kanaleve që përçojnë në mënyrë të vazhdueshme të opinioneve që nuk përputhen me realitetin. Nuk ka asgjë për të ngjyrosur me rozë në realitet por ama që sot janë dita me natën shumë nga ndërveprimet mes biznesit dhe institucioneve dhe sot është si dita me natën jeta e një importuesi, eksportuesi, sipërmarrësi që I ka shumë më të pakta hallet që kishte dje për shkak të këtyre ndërveprimeve është e pajustifikueshme që të mos pasqyrohet”, tha kryeministri gjatë një takimi me dhomat e biznesit këtë të Premte.
Rama tha se gjërat kanë ndryshuar si dita me natën.
“Na takon të kërkojmë nga të gjitha Dhomat e Biznesit që përgatisin raporte të klimës të jenë më të përgjegjshme për mënyrën si I përgatisin ato raporte. Jo se dua unë por e pamundur që Shqipëria nëpër raportet të dalë njësoj sikur kur ishte radha kilometrike nëpër sportele, kontrolle arbitrare e prita nëpër dogana e porte e pika kufitare, sot nuk ekzistojnë. Janë elektronike të gjitha. Si dalin njësoj, dalin njësoj nga arbitrariteti dhe brutaliteti I atyre që flasin pa lidhje dhe anketimeve që bëhen në mënyrë jo profesionale. Kjo kërkesë e imja nuk ka të bëjë me qeverinë apo nevojë të qeverisë në vetvete por raport përgjegjshmërie me vendin të të dyja palëve”, u shpreh ai.
Rama foli për nevojën e përmirësimit të legjislacionit për dhomat e tregëtisë.
“Kemi legjislacion shumë të prapambetur për funksionin e dhomave të tregtisë”, tha Rama.
