Trafiku në kryeqytet vijon të mbetet një strumbullar që vështirëson akoma edhe më shumë jetën e banorëve të Tiranës.
Një fotografi nga “Google Map” mbi situatën aktuale të trafikut, tregon Unazën e Tiranës dhe rrugët lidhëse me të, të ngjyrosura me të “kuqe” dhe “portokalli”. Tregues ky që përcakton trafikun e rënduar në këto akse.
Dhe parorama paraqitet e tillë në një kohë kur piku i lëvizjeve ende nuk ka ardhur. Pas nisjes së arsimit 9-vjeçar e të mesëm si dhe universiteteve, lëvizjet me automjete pritet që të shtohen e për pasojë edhe trafiku të përkeqësohet.
Bashkisë së Tiranës iu tërhoq vëmendja për këtë edhe ditën e djeshme. Në komisionin e posaçëm parlamentar për reformën administrative, deputetja e PL-së Erisa Xhixho tha se koha e qëndrimit në trafik në kryeqytet përbën një problem.
“Mos më thoni që trafiku në Tiranë nuk është problem. Është problem shumë i madh për qytetarët e Tiranës dhe jemi në vendin e 182”, iu drejtua ajo nënkryetarit të Bashkisë së Tiranës Arbajan Mazniku, duke iu referuar një raporti të fundit nga NUMBEO.
Bashkia ndërmori një nismë të shumëdebatuar, me qëllim sipas saj uljen e fluksit të trafikut. U bë kthimi në korsi për biçikleta në vendkalimet e automjeteve. Synimi, sipas bashkisë, ishte që qytetarët të braktisnin automjetet dhe të lëviznin me biçikleta. Megjithatë më shumë se zgjidhje, nisma u kthye në një bumerang duke shtuar akoma më shumë trafikun.
Një tjetër nismë e dështuar rezultuan biçikletat “mobike”, që mund të merreshin me qera nga qytetarët përmes një pagese me kartë bankare. U prezantua me bujë nga kryebashkiaku i Tiranës Erion Veliaj megjithatë dështoi shpejt, kompania u tërhoq dhe biçikletat mobike u zhdukën.
Më e vështirë lëvizja bëhet për ata që përdorin transportin urban. Përveç kohës së stërzgjatur të qëndrimit në trafik, detyrohen të shtypen si sardele në konserva për të arritur në kohë në destinacion.
E ndërsa Veliaj dhe institucionet shpenzojnë miliarda në tendera publikë, shpesh ngrihet pikëpyetja nëse është mënyra e përdorimit të taksave të qytetarëve po investohen në mënyrë efiçente në interes të tyre. Apo më keq akoma, nëse po vidhen nga Veliaj në bashkëpunim me klientët e tij, duke anashkaluar problemet akute të një qyteti, që përveç trafikut të rënduar, do të përballet me siguri me përmbytje nga shirat e vjeshtës, dimrit, paraverës e verës tjetër nëse Erion Veliaj do të vijojë të jetë në krye të Bashkisë së Tiranës.
