Komisioni i Posaçëm Parlamentar që është ngritur për të diskutuar mbi propozimet për një reformë të re Administrativo-Territoriale, ka vijuar ditën e dytë të punimeve prej orës 09:00.
Sipas rendit të ditës, komisioni duhet të niste me një seancë dëgjimore me përfaqësues nga Bashkia Tiranë, seancë të cilën ka zgjedhur ta injorojë kryebashkiaku Erion Veliaj.
I gjendur mes një lumi akuzash për shpërdorim të fondeve publike, përkeqësimin e jetesës në kryeqytet nën drejtimin e tij, betonizimin e Tiranës, apo edhe kaosin e krijuar me hapësirat e parkimit, Veliaj ka shmangur një ballafaqim dhe vendosjen para përgjegjësisë nga ana e deputetëve të opozitës.
Ashtu siç zakonisht bën, duke qenë tepër i angazhuar në vijimin e propagandës të punëve të tij boshe, kreu i Bashkisë Tiranë ka dërguar në Komision për të mbuluar dështimet e tij, nënkryetarin Arbër Mazniku.
Por, nënkryetarja e Komisionit, Dhurata Çupi shprehu shqetësimin e saj duke kërkuar që në sallë të jetë vetë Veliaj, për t’i treguar qytetarëve se nuk ka arritur t’i përmbushë pritshmëritë në drejtimin e bashkisë më të madhe në vend.
“Duhet të vinte vetë kryetari i Bashkisë, ai duhet të ishte aty t’i tregonte qytetarëve që nuk ka mundur dot të mbajë bashkinë. E rëndësishme është që nuk vjen ai. Kjo tregon se ju e keni paragjykuar këtë raport, dilni në media e thoni se si është kjo reformë e më pas jepni deklarata. Mos jepni deklarata deri sa të ketë përfundime. Kur kryetari i Bashkisë së Tiranës nuk vjen tregon shumë”, tha Çupi.
Në krahun tjetër, Mazniku u përpoq të mbrohej duke thënë se Bashkia Tirana e cilëson reformën një sukses të jashtëzakonshëm.
Për më tepër ai ka hedhur “topin” në fushën e qeverisë, duke shprehur ambicien që me reformën e re territoriale, kryeqyteti të zgjerohet edhe me bashkitë Kamëz dhe Vorë, të cilat njihen si dy bastione të djathta.
“Ne jetojmë në Tiranë, mjafton të shikohet se si ka ndryshuar jeta e qytetarëve. Bashkia Tiranë i ka shlyer borxhet ish-komunave. Që do të thotë që menaxhimi financiar ka qenë efektiv. Për mua nuk ka arsye pse Tirana mos të ishte bashkuar edhe me Vorën dhe me Kamzën. Bashkimi i Vorës dhe Kamzës në territorin e Tiranës do jepte cilësi më të mirë për qytetarët. Dhe që këta të fundit të mos kishin një ndjesi si pjesë e një qyteti të nivelit të dytë”, tha Mazniku.
Ndërkohë, Çupi iu përgjigj me ironi duke thënë: “Të merrnit edhe Romën e Parisit…”.
Në debat ndërhyri edhe ish-ministrja e Ekonomisë, Anila Denaj që është bashkëkryetare e komisionit duke ironizuar ish-kryebashkiakun e Kamzës, Xhelal Mziu.
“Kukësin edhe mundet zoti Mëziu”, shtoi Denaj.
