Është arrestuar vëllai i Klajdi Kodrës, autori i plagosjes së Reginaldo Kaçorrit në maj të vitit 2021 tek Komuna e Parisit, në Tiranë.
Arrestimi u bë pas shkëmbimit të informacionit mes Komisariati 2 Tiranë dhe Policisë Kufitare.
Ai është kapur në doganë në përpjekje për të kaluar kufirin mbrëmjen e kaluar.
I arrestuari është A. K., 26 vjeç, banues në Tiranë.
Ky shtetas ishte shpallur në kërkim, pasi Gjykata e Rrethit Gjyqësor Tiranë i ka caktuar masën e sigurisë “Arrest në burg”, për veprat penale “Vrasja me dashje“, e mbetur në tentativë, dhe “Mbajtja pa leje e armëve, armëve shpërthyese dhe e municionit”.
“Ky shtetas ishte shpallur në kërkim pasi më datë 21.05.2021, në rrugën “Liman Kaba”, dyshohet se në bashkëpunim me vëllanë e tij, shtetasin K. K. (i shpallur në kërkim), ka tentuar të vrasë me armë zjarri shtetasin Reginaldo Kaçorrit 19 vjeç. Gjithashtu, në ngarkim të shtetasit A. K. u referuan materialet shtesë në Prokurori, për veprën penale “Kalimi i paligjshëm i kufirit”, pasi dyshohet se ka kaluar kufirin më mënyrë të paligjshme”, njofton policia.
Ngjarja ka ndodhur pasditen e 21 majit te Kompleksi Olimpik, në Tiranë, ku pas një konflikti të çastit mes të rinjve, Kodra ka nxjerrë armën dhe e ka qëlluar një herë drejt Kaçorrit, ku dhe e ka lënë të plagosur.
Klajdi Kodra, nga Laçi, nuk është emër i panjohur për drejtësinë, pasi ky i fundit është përfshirë në disa plagosje ku dhe ka kryer burg.
