Policia ka bllokuar tre mjete lundruese në plazhin e Durrësit dhe të Dhërmiut. Shërbimet e Policisë Kufitare në Durrës, kanë konstatuar në plazhin e Durrësit, një mjet lundrues motoskaf me drejtues shtetasin serb E. K., duke lëvizur jashtë zonës së përcaktuar për mjetet lundruese.
Po nga shërbimet e Policisë Kufitare Durrës u konstatua një mjet lundrues “Jet ski”, në plazhin e Durrësit, me drejtues shtetasin A. Ç., i cili nuk dispononte dokumentacionin përkatës në bordin e mjetit.
Edhe në plazhin e Dhërmiut, policia ka konstatuar një mjet lundrues tip “Jet ski”, me drejtues shtetasin R. B., i cili nuk dispononte dokumentacionin përkatës.
Ndërkaq janë ndëshkuar me masë administrative 10.000 lekë të rinj, 2 drejtuesit e mjeteve lundruese “Jet ski”, dhe me 100.000 lekë të rinj, drejtuesi i mjetit lundrues motoskaf.
“Policia Kufitare do të vijojë kontrollet me qëllim garantimin e rendit dhe sigurisë për pushuesit, gjatë sezonit turistik dhe fton qytetarët që të denoncojnë çdo rast paligjshmërie, në aplikacionin Komisariati Dixhital ose të telefonojnë në numrin pa pagesë 112, duke iu garantuar anonimatin, reagim të shpejtë dhe profesional.”, njofton policia në reagimin e saj.
