Kriza energjetike që ka mbërthyer mbarë botën, qeveria shqiptare ka zgjedhur ta përballojë me një zgjidhje afatshkurtër, siç janë anijet që prodhojnë energji.
Nisma e qeverisë për të pritur dimrin e vështirë dhe rritjen e çmimit për kWh në treg është shpjeguar për Report Tv, nga kreu i KESH, Ergys Verdho, i cili ka sqaruar se anijet janë në Mesdhe dhe nga data 9 deri me 15 shtator do të jenë në Shqipëri, për t’u stacionuar në Vlorë.
Teksa ka nisur puna për pozicionimin e tyre, skenari parashikon që prodhimi i parë i energjisë të bëhet në nëntorin e këtij viti, ndërsa anijet do të jenë bashkudhëtarë për 2 vite dhe më pas parashikohet që të bëhenn pronë e KESH.
“114 mega në orë, kjo është ndihma që na japin anijet. Kur ne ta kemi të nevojshme, kur nuk kemi shi, do të dalim. Ne studiojmë bursën çdo ditë. Anijet kanë frymëmarrje të madhe. Ne kemi 70% prodhim vendi, 30% import. Prodhimi i anijeve minimizon blerjet në import. Anijet janë me kosto afërsisht 200 euro/MGË. 200 euro është sipas bursës së karburantit”, tha Verdho.
Por, pavarësisht se qeveria pretendon të shmangë kufizimet e energjisë elektrike me këtë nismë, Parti Demokratike ka hedhur akuza, duke theksuar se kostoja për dy vite qira në buxhetin e shtetit do të jetë mbi 760 milionë euro.
Sipas kryedemokratit Sali Berisha, projekti do të sjellë ndotje masive në Vlorë.
“Anija që po sjell impiantet nga Bangladeshi për prodhimin e energjisë, në portin e Vlorës, ka hyrë në kanalin e Suezit. 760 milionë euro është e llogaritur nga specialistët më të mirë, kostoja për 2 vite që do të punojnë këto impiante, përfshirë këtu qiranë dhe naftën që shpenzojnë”, njoftoi Berisha të premten e kaluar.
Sa i përket impaktit në ambient të këtyre dy anijeve, kreu i PD ka thënë se kemi të bëjmë me “dy impiante që kanë funksionuar në 2018 në Kulna të Bngladeshit, gjeneratorë gjigandë që funksionojnë me naftë të rëndë, e cila ka në përbërjen e vet 50 ml për litër squfur, e ndaluar për tu përdorur”.
“Me këtë toksicitet ai do krijojë një ndotje në Vlorë të barabartë sikur të shtohen 100 mijë makina dhe këto të bëjnë 100 km rrugë. Është një çmenduri! A mund të rrihet në Vlorë në këtë situatë?!”, zbuloi ai.
