Ish-kryeministri Sali Berisha deklaroi këtë të Premte se Gledis Nano u shkarkua nga detyrua e Drejtorit të Policisë për të mbuluar aferat e Edi Ramës.
Berisha tha se vëllai i Edi Ramës është i përfshirë në afera të jashtëligjshme me mashtrimin e Call Centerave, ndërsa hodhi dyshime se ministri i Brendshëm ka lidhje me një sasi të madhe droge të sekuestruar.
Po ashtu, ai shtoi se ka zëra që thonë se Nano mësoi nga ish-efektivi i arrestuar për lidhje me Ervis Marinajn, se ky i fundit paguante ish-drejtorin e Policisë Ardi Veliu.
“Kjo e call-center dhe implikimi i Olsi Ramës është bërë publike. Nuk është një gjë e re. Këtë e sollën autoritetet gjermane. Tani, Edi Rama, dyshon se ky lehtësoi hetimin gjerman apo nxori sekretin, këtë nuk e di. E vërteta është se bixhozxhiu më i madh i Shqipërisë dhe Ballkanit është Olsi Rama dhe për pasojë familja Rama. Kjo nuk është sekret. Ky është gjithçka”, tha Berisha.
“Kurse ministri i familjes, kur u akuzua si president i shoqatës së skafistëve, tha se merrem me vela. Por doli që shoqata e tij transportonte drogë në Itali dhe 2.2 ton, sasi kolosale. Të gjithë përfolën ministrin. Sepse ishte presidenti i velistëve. Kishte të dhëna të tjera në mesazhe, por të paverifikuara. Por kjo është evidente. Çfarë do ministri në një shoqatë që transporton drogë? A nuk përbën kjo imunitet për atë shoqatë? Ministri është i familjes”, shtoi ai.
“Nuk kam ndonjë respekt për Gledis Nanon se u zgjodh mbi kritere politike, por largimi i tij ishte politik, se u shkeli në kallo. Thuhet se largimi i tij ka lidhje me kontejnerin që u la pesë javë në port derisa u vodh e gjithë kokaina. Kjo e tërboi Edi Ramën. Thuhet se ky takoi Jetmir Ladën, i cili ndër të tjera i tha se Ardi Veliu paguhej 30 mijë euro në muaj nga Ervis Martini. E sigurt është që fillimi është brenda familjes Rama. Atë nuk mund ta hiqte asnjë njeri tjetër përveç kryeministrit. Ministri nuk e heq dot. Kështu ky u hoq për afera të Edi Ramës. Po pse, për Ardi Veliun e hoqi ai? E ka hequr për veten e tij, për familjen e tij”, shtoi Berisha.
