Nga Boldnews.al
Ndoshta për kryeministrin Edi Rama pushimet e vërteta plot relaks mund të jenë këto tre ditë në Beograd, teksa merr pjesë në “panairin e verërave”, në kuadër të nismës së “Ballkanit të Hapur”.
Në krah të presidentit serb Vuçiç, kreu i qeverisë shqiptare si gjithnjë nuk zhgënjeu me fjalimin e tij, plot haluçinacione dhe mbi të gjitha në delirin e një “lideri të madh”, që ka mërrë përsipër të zgjidhë çështje që në shekuj janë mbushur me masakra, gjak, humbje jetësh dhe genocide mbi shqiptarët e Kosovës.
Kjo është historia që nuk mund të zhbëhet me barrën e turpit, e as me gotën e verës së kuqe serbe që herë ngatërrohet me gjakun e derdhur të shqiptarëve e herë me pijen alkoolike që përhumb mendjet goxha të përhumbura të Tiranës zyrtare.
Janë gjashtë vende të Ballkanit Perendimor, por vetëm tre e kanë nënshkruar nismën e “Ballkanit të Hapur”, Shqipëria, Serbia dhe Maqedonia e Veriut. Refuzojnë të bëhen pjesë e saj Kosova, Mali i Zi dhe Bosje Hercegovina.
Është tërësisht një nismë personale dhe si për çudi nisi si ide dhe u bitis po aty teksa Voçiç, Rama dhe ish-kryeministri maqedonas Zaev, ndodheshin në hollin e një hoteli në Nju Jork të SHBA-ve teksa pinin një gotë verë.
Autorësinë e kësaj ideje e ka marrë Rama dhe në fund, i “aloolizuar” nga deliri dhe aspak nga pija, kreu i qeverisë shqiptare e bëri fakt të kryer marrëveshjen për “Ballkanin e Hapur”.
Ajo në thelb përfshin katër liritë themelore që janë lëvizja e lirë e njerëzve, mallrave, shërbimeve dhe kapitalit. Efektet janë dhënë në asketin ekonomik dhe politik. Në pjesën ekonomike Serbia po i sheh të mirat për gati një vit.
Mallrat serbe sidomos ato industriale tashmë gjenden lirshëm në marketet shqiptare, por ajo që po zë frymën janë edhe ato të prodhimeve bujqësore dhe blegtorale. Raporti i tregtisë është gjithnjë në favor të Serbisë, pasi ka shumë më të zhvilluar si industrinë ushqimore ashtu edhe atë bujqësore, duke lënë shumë pas Shqipërinë që fermerët e saj i ka lënë në mëshirën e tekave të motit, pa mbështetje, pa ide zhvillimi dhe mbi të gjitha pa subvencionime domethënëse.
Ndërsa ana ekonomike ikën e vjen, barra e rëndë që nuk ka verë serbe, apo “Raki Surreli” ta trullosë edhe për pak orë është pjesa gjeopolitike. Kosova e refuzon kategorikisht pjesëmarrjen në këtë nismë me argumentimin se “Ballkani i Hapur”, pa një mbikëqyrje ndërkombëtare dhe pa praninë e të gjitha shteteve të Ballkanit Perëndimor ndihmojnë vetëm Serbinë, si në çështjet ekonomike ashtu edhe politike.
Madje kjo është arsyeja që deri më tani “Ballkani i Hapur” ka mbetur një nismë mëse periferike që nuk mbështet si nga BE ashtu edhe nga SHBA. Edhe propaganda se SHBA e mbështet është tërësisht e pavërtetë pasi në jo pak raste, i dërguari amerikan në Ballkanin Perëndimor, Gabriel Escobar është shprehur se vlera e një nisme të tillë ka efektin e duhur vetëm nëse mbështete nga të gjithë shtetet.
Në një skaj edhe më të largët është BE, veçanërisht Gjermani e cila as që e përmend si “vlerë të shtuar” Ballkanin e Hapur, pasi janë vetëm pro nismës së “Samitit të Berlinit” i cili nisi me kancelaren Merkel. Ajo synonte që të gjashtë vendet e Ballkanit Perëndimor të mbështeteshin ekonomikisht në nisma të përbashkëta dhe investime infrastrukturore dhe më pas i gjithë procesi të kishte ndikim politik, ku qëllimi kryesor mbetej një marrëveshje e mundeshe e përhershme Serbi-Kosovë ku të dy vendet të njihnin njëra-tjetrën.
Ky veprim gjeopolitik i Merkel u vendos nën “këmbët e gjata” të dyshes Rama-Vuçiç, duke anashkaluar faktorin ndërkombëtar dhe bërë një çorbë ballkanike me propagandën se “merreshin vesh vetë”.
Pa mbushur ende një vit të plotë nga hyrja në fuqi të marrëveshjeve “Ballkani i Hapur” i Ramës i ka realizuar objektivat: Vuçiç është bërë edhe më i fuqishëm dhe Rama në këtë mes duket si ushtari i bindur i një gjenerali që ishte ministër i propagandës në kohën e kasapit të Ballkanit, Slovodan Milosheviç. Turpi po kapërdihet me verë serbe!
