Nga Boldnews.al
Dikush vendos bast në skedina, me mundësi të ndryshme fitimi, ku shpesh del me humbje. Mirëpo basti i vërtetë që gjithnjë del i fituar është ai i kreut të qeverisë Edi Rama. Ai vendosi përfundimisht se do të lejohen bastet online.
Ky ishte “revolucioni i Rilindjes”. Nuk ka më skedina fizike, sepse çdo “shërbim” tani do të merret online, por këtë herë ndryshon vendi dhe “pronari” i vërtetë që do të përfitojë nga këto baste.
Gjithçka ishte gatuar më së miri, për t’i dhënë idenë se kjo nismë e Ramës vjen pasi kishte shumë “presion nga poshtë” nga komuniteti sportiv në vend. Duke nisur nga futbolli dhe vijuar me kreun e KOKSH-it Fidel Ylli (ish-deputet socialist) dhe drejtues federatash të ndryshme që bëjnë boks dhe thyejnë kutitë e votimit sa herë kanë zgjedhje, i sugjeruan Ramës që të ligjëronte bastat online.
Vetë Rama, si një Sulltan i dëgjueshëm, që pranon edhe këshillat e eunukëve u dha fjalën, duke vendosur bast se ai do i lejonte bastet online, por sipas tij më një mbikëqyrje të fortë, e madje edhe me asistencën e kompanive ndërkombëtare.
E gjitha ishte një lojë e frikshme që në mes nuk ka çështjen e fatit, sepse që nga koha e ndalimit të lojërave të fatit dhe lotove dhe deri më tani disa personazhe që kontrollonin këtë treg janë zhdukur me “lotarinë e jetës”. Tashmë rruga është e lirë dhe kontrolli do të jetë në duart e qeverisë, e cila ka treguar se kur themi qeveria nënkuptojmë Ramën dhe kur themi Rama nënkuptojmë gjithë qeverisjen.
Nën obrellën e “kompanive ndërkombëtare” që do të japin asistencë në ligjin e ri tashmë është vetëm çështje ditësh që do i hapë rrugë lejimit të basteve sportive online, ku kontrolli është nga qeveria…
Po çfarë e bëri Ramën që të ndryshojë mendim dhe nxisë për ca ditë kanakarë të tij që në emër të zhvillimit të sportit të bërtisnin me të madhe rikthimin e lotove sportive onlinë?
Ky treg ka mbetur bosh, për aq kohë sa disa personazhe që deri para ndalimit me ligj e kontrollonin sot nuk janë më, madje mund të mos jenë për fare.
Në vitin 2018 kur u vendosi çelësin të gjithë lotove dhe kazinove të vogla, të shparndara kudo në Shqipëri, Rama përmendi librat e shenjtë që nuk lejonin bixhozin si një ves e madje mëkat i madh. Ai gjithashtu “preku” zemrat e grave që do u rikthente djemtë dhe burrat në rrugën e drejtë duke mos shkaktuar më drama në familjet tona.
Shumë e përkrahën këtë nismë, por sot ka ndryshuar shumëçka. Nuk do ketë më burra apo dhe të mitur që vendosin skedina në lokalin më të afërt, por ato mund t’i vendosin edhe duke ndenjur në shtëpi, nëpërmjet telefonit…
Ky është “revolucioni i Rilindjes”, por ketë herë vetëm një grusht njerëzish do përfitojnë nga bastet. Me bast që Rama nuk humbet në bast!
