Ismet Çekorja është vrarë me armë zjarri në Shkodër këtë të Premte.
Nga informacionet e para policore, mësohet se ai është qëlluar me armë zjarri nga një person pranë banesës së tij në lagjen “Guerrile”.
Çekorja është transportuar në spitalin e Shkodrës, por nuk ka mundur të mbijetojë.
“Në lagjen ‘Guerrile’, në Shkodër, në rrethana ende të paqarta është plagosur me armë zjarri shtetasi I. Ç., 57 vjeç, banues në lagjen ‘Guerrile’, Shkodër, i cili më pas ka ndërruar jetë në Spitalin Rajonal Shkodër. Grupi hetimor, nën drejtimin e Prokurorisë, vijon punën në vendngjarje, për sqarimin e plotë të rrethanave, dokumentimin ligjor të kësaj ngjarjeje, me qëllim identifikimin dhe kapjen e autorit/ëve. Shërbimet e Policisë vijojnë kontrollet, me pika kontrolli në zonën përreth, me qëllim kapjen e autorit/ëve”, njoftoi policia.
Ismet Çekorja babai i të shpallur në kërkim
Ismet Çekorja është babi i babai Bajram Çekores, në kërkim për atentatin ndaj Alban Bruçit, më 25 gusht.
Pak ditë më parë, ai dha një deklaratë për mediat, ku shfajësonte të birin nga akuzat.
Ai tha se një grup banditësh, së bashku me njerëz me pushtet, duan ta mbajnë në burg të birin.
Po ashtu, Ismet Çekorja zbuloi se është ka nip Arjan Ferracakun edhe ky i ekzekutuar në Shkodër, në Shtator 2018.
“Policia ka ardhur në banesën tonë pas vrasjes së Arjan Ferracakut një kohë që viktima ishte nipi im po ashtu kur u vra edhe Fatos Ferracaku prapë më kanë thirrur mua dhe djalin. Pastaj janë vrarë vëllezërit Bilali dhe sërish policia në banesën time një kohë që kemi kaq shumë vite që jemi fqinj. U plagos Admir Bajri, prapë në banesën time një kohë që familja jonë e ka patur një lloj njohje me familjen e tyre. Po ashtu u qëllua shefi i policisë bashkiake të Malësisë së Madhe sërish në banesën time kur në fakt autorët dolën krejt persona të tjerë. Rasti i fundit është me Alban Bruçin, djalin e Lad Bruçit të cilin unë e kam shumë mik dhe nuk ka asnjë shans që djali im të qëllojë djalin e tij kur ne kemi shumë miqësi aq më tepër që Bajrami, djali im është i monitoruar me kamera”, tha ai.
“Këto sulme ndaj familjes tonë i bëjnë disa bandit, hajdutë biçikletash dhe banditë të veshur me pushtet. Se cila është arsyeja ne nuk e dimë. Ajo që kërkojmë është drejtësia. Djali im është i pafajshëm dhe nuk ka marrë pjesë në asnjë prej ngjarjeve kriminale për të cilat është i dyshuar. Janë të gjithë inskenime dhe tani ai duhet të qëndrojë rrugëve dhe nuk mundet as të punojë as asgjë. Kërkojmë drejtësi dhe të zbardhen ngjarjet” , u shpreh Ismet Çekorja.
Atentati më 25 gusht
Drejt Alban Bruçit u qëllua me armë zjarri më 25 gusht në Shkodër teksa lëvizte me një makinë tip ‘Audi A3’. Ai arriti që të shpëtojë pa u plagosur.
Ngjarja ndodhi rreth orës 21:00 në lagjen ‘Rus’.
25-vjeçari shkoi vetë në polici dhe bëri një kallëzim për këtë atentat për të cilin policia shpalluri në kërkim Bajram Çekorjan, 24 vjeç dhe Tonato Fushën, 20 vjeç.
Ata akuzohen për veprat penale “Vrasja me paramendim”, mbetur në tentativë, “Mbajtja pa leje e armëve dhe e municionit luftarak”, si dhe “Prishja e qetësisë publike”.
Konflikti
Dy vite më parë dyshohet se datojnë rrënjët e konfliktit që solli atentatin ndaj Alban Bruçit.
Sipas policisë, rezulton se para 2 vitesh Alban Bruçi është konfliktuar për motive të dobëta me Tonato Fushën, ku ky i fundit ka mbetur i plagosur pas sherrit me 25-vjeçarin.
Tonato Fusha është djali i biznesmenit dhe ish-presidentit të Vllaznisë, Valter Fusha. Edhe emri i autorit tjetër të dyshuar është i njohur për drejtësinë. Bajram Çerkoja, sipas hetuesve mik me Tonato Fushën, është arrestuar në vitin 2019, pasi dyshohet se ndihmoi Berush Bregun, sipas hetuesve krahu i djathtë i Licve në Shkodër, i arrestuar në 2019 pasi ishte në kërkim për drogë. Policia njoftoi asokohe se ai dyshohet dhe si autor i disa ngjarjeve të rënda kriminale në qarkun Shkodër.
