Nga Boldnews.al
Kush ka mundësi të fusë duart në buxhetin e shtetit abuzon me miliona euro tendera publikë. Kush ka mundësi për mitmarrje e bën pa sikletin më të vogël, edhe kur bëhet fjalë për ndihma humanitare, ushqime e veshmbathje për të vobektit, apo ilaçe për të sëmurët, sërish nëpunësit e Rilindjes i zhvasin.
Kjo ndodhi në Pogradec, ku katër punonjës të kësaj bashkie u kapën duke përvetësuar disa pako me ilaçe dhe ndihma të tjera spitalore të cilat ishin donacione nga qeveria gjermane. Të katër nëpunësit hajdutë me kollare u arrestuan, por më shumë se “vlera” shërben gjesti, që është treguesi i qartë se hajnia nuk ka më asnjë kufi, kap ç’të të kapësh, vetëm pa gjë mos dil…
As që do prekeshin sepse i mbron sekti ku pushtetojnë, por një video e shfaqur në rrjetet sociale teksa vendosnin pakot në automjetet e tyre detyroi policinë që ti shoqëronte dhe procedonte më tej penalisht.
Nuk është hera e parë që vidhet deri ndihma për familjet në nevojë, qofshin ato edhe një pako ushqimore që në vlerë monetare mund të mos i kalojnë më shumë se 25 mijë lekë të vjetra. Është sëmundja që nuk e lë këtë “sekt pushtetarësh” para dëshirës dhe yshtjes së brendshme për të vjedhur dhe përvetësuar. Më shumë se vlera që marrin është kënaqësia që fitojnë, duke u shtuar adrenalinën se janë të zotë në këtë fushë.
Për të kuptuar sesa makutë deri në malinjtet që as gjaku dhe jetët e humbura nuk i ndalin është rasti i 28 nëntorit të vitit 2019. Shefi i seksionit të Rendit pranë komisariatit të Rinasit A. Zekaj dhe bashkëshortja e tij V. Zekaj, pedagoge tek Akademia e Mbrojtjes dhe njëherësh kryetare e furumit të gruas së PS-së në njësinë 3 në Tiranë vodhën ndihmat që ishin nisur për të dëmtuarit nga tërmeti tragjik.
51 viktima u shënuan, mes tyre gra dhe fëmijë, mbi 300 të plagosur, mijëra familje mbetën pa strehë dhe ankthi vijonte, por kishte mendje aq djallëzore të lidhur kokë e këmbë me Rilindjen që shkuan deri në atë pikë sa të përvetësonin batanijë dhe ushqime të siguruara nga një organizatë humanitare.
Në çdo institucion ku kryhet një tender apo jepet një shërbim grabitja, korrupsioni dhe vjedhja e rëndomtë është kthyer në “normalitet”, pasi gjithçka kontrollohet nga lart. Grabisin atë që kanë në duar. Ndryshon vetëm forma dhe vlera e përvetësuar, pasi qëllimi është i njëjtë. Mjafton që diçka të marrin.
