Kiev – Forcat ukrainase kanë nisur një kundërofensivën në jug të vendit, që synon të shtyjë trupat ruse përtej lumit Dnipro dhe të rimarrë qytetin e pushtuar Kherson, njoftuan autoritetet vendore të hënën.
“Sot pati sulme të fuqishme artilerie në pozicionet e armikut … në të gjithë territorin e rajonit të pushtuar të Kherson,” tha për mediat ukrainase deputeti i zonës dhe këshilltari i guvernatorit rajonal Sergey Khlan.
“Ky është njoftimi i asaj që ne kemi pritur që nga pranvera: është fillimi i dhënies fund të pushtimit të rajonit Kherson,” shtoi Khlan.
Mediat ukrainase kishin cituar më herët zëdhënësen e komandës jugore të ushtrisë ukrainase, Natalia Humeniuk, të thoshte se forcat e Kievit po sulmonin “në shumë drejtime” në këtë front.
Grupi ushtarak ukrainas “Kakhovka” deklaroi në Facebook se vërejti tërheqjen e një njësie të luftëtarëve separatistë pro-rusë nga pozicionet e tyre në rajon.
Këto pretendime ishin të paverifikueshme nga burime të pavarura.
Me luftën në Ukrainë tani në muajin e saj të gjashtë, javët e ardhshme mund të jenë vendimtare. Ukraina është zotuar të dëbojë rusët nga territori që ata kanë kapur që nga fillimi i pushtimit, duke përfshirë rajonin jugor të Khersonit, ndërsa Moska është zotuar të mbajë zonat e pushtuara dhe të kapë më shumë terren në të gjithë vendin.
Ukrainasit kanë përdorur raketahedhës të furnizuar nga Amerika si “Himars” për të goditur urat dhe infrastrukturën ushtarake në jug, duke e detyruar Rusinë të devijojë forcat e saj nga Donbasi në lindje për t’iu kundërvënë kërcënimit të ri.
Një urë kyçe pranë Khersonit u shkatërrua nga ushtria ukrainase në fillim të kundërofensivës, duke ndërprerë trafikun nëpër të dhe krijuar probleme të mundshme furnizimi për forcat ruse në zonë.
Rusia mund të përdorë ende një kalim të dytë në Dnipro për të transportuar furnizimet dhe përforcimet për trupat e saj në Kherson, i cili shtrihet në veri të Gadishullit të Krimesë – i aneksuar nga Rusia në 2014 – por sulmet e Ukrainës kanë treguar cenueshmërinë e Rusisë dhe dobësinë në mbajtjen e kontrollit mbi këtë rajon.
Ndërsa pjesa më e madhe e aseteve ushtarake ruse dhe ukrainase janë të përqendruara në Donbas, rajoni industrial i minierave dhe fabrikave, të dyja palët shpresojnë të kenë fitim diku tjetër.
Zyrtarët pushtues të emëruar nga Moska në Kherson kanë folur për mbajtjen e një referendumi për bashkimin me Rusinë që në shtator. Këto plane varen nga aftësia e Rusisë për të fituar kontrollin e plotë të atyre zonave deri atëherë. Trupat ruse e kishin pushtuar Kherson, një qendër bujqësore me 280,000 banorë, kur filloi pushtimi i Ukrainës.
