Deputeti i PD Flamur Noka duket se nuk është habitur shumë nga shpalosja e flamurit me yll të PPSH-së në festivalin më të bujshëm të vitit, “Synny Hill” që u mbajt në Tiranë. Sipas Nokës, kjo ndodh në Tiranë, ku sundojnë fëmijët e dikurshëm të Bllokut apo vendin e qeveris një derivat i Partisë Komuniste.
“Mbi shqiponjën nuk ka tjetër” – thekson Noka në shënimin e tij në Fb sot, tek vëren:
“Fotolajmi se flamuri i RPSSH-së u shpalos në festivalin “Sunny Hill” mori sensancion të madh dhe reagime të shumta e unë refuzoj t’jua shfaq këtu, pasi gjykoj se shpërndarja masive është në vetvete një ndër qëllimet më malinje të atyre që e kanë stisur këtë ngjarje.
Në vend të atij flamuri që simbolizon shtetin më të varfër e të mbyllur të Europës, shtetin e tollonave, të radhëve të qumështit e vajgurit, të burgjeve e kampeve të internimit, dëshiroj të ndaj me ju qasjen e disa vendeve të ish-bllokut komunist, që pak ditë më parë mbyllën përfundimisht kapitullin më të errët të historisë së tyre, duke shkulur përmendoret me simbolika komuniste.
Çekia, Estonia dhe Letonia, tri shtete që të marra së bashku, nuk kanë kaluar çerekun e vuajtjeve të shqiptarëve, i hoqën nga sheshet e qyteteve të tyre rraqet e mbetura nga sundimi sovjetik. E kundërta ndodh në Tiranë, ku sundojnë fëmijët e dikurshëm të Bllokut.
Ky është ndryshimi i Shqipërisë aktuale nga republikat e tjera të Europës Lindore. Atje ka vullnet politik dhe dëshirë për përparim dhe zhvillim demokratik, ndërsa këtu qeveris një derivat i Partisë Komuniste, që emrin e ndërron por zakonin s’e harron,” nënvizon në përfundim Flamur Noka.
