Presidenti i SHBA, Donald Trump, ka nënshkruar një urdhër ekzekutiv që parashikon ndëshkim me burg për çdo person që digj flamurin amerikan. Vendimi ngarkon Departamentin e Drejtësisë të hetojë rastet e tilla, të cilat Trump i konsideron “nxitje të trazirave” dhe jo shprehje e lirisë së fjalës.
Sipas urdhrit, çdo individ i kapur në aktin e djegies së flamurit do të përballet me akuza penale dhe dënim deri në një vit burg, pa mundësi lirimi të parakohshëm. “Djegia e flamurit është një akt që ndez përçarje dhe dhunë si kurrë më parë. Nuk mund të lejohet që simbolet kombëtare të dhunohen në emër të një lirie që kthehet në anarki,” deklaroi Trump.
Këshilltarët e Shtëpisë së Bardhë sqaruan se ky urdhër nuk bie ndesh me Amendamentin e Parë, i cili mbron lirinë e fjalës, por vendos kufi mes “protestës simbolike” dhe akteve që rrezikojnë rendin publik.
Presidenti Trump ka shprehur prej kohësh kundërshtimin ndaj djegies së flamurit, duke paralajmëruar që në vitin 2016 se një akt i tillë duhet të sjellë pasoja serioze, nga humbja e shtetësisë deri te ndjekja penale.
Vendimi i ri vjen në një kohë kur mbështetja publike për ndalimin e këtij veprimi është në rritje. Një sondazh i vitit 2023 tregoi se 59% e amerikanëve e konsiderojnë djegien e flamurit të papranueshme.
Megjithëse Gjykata Supreme në vitin 1989 e cilësoi djegien e flamurit si “fjalim simbolik” të mbrojtur nga kushtetuta, Trump argumenton se në kohë sfidash kombëtare, uniteti dhe respekti ndaj simboleve kombëtare duhet të jenë përparësi.
“Askush nuk ka të drejtë të djegë krenarinë e një kombi që u ndërtua me gjak, mund dhe sakrifica. Ky nuk është fjalim, ky është zjarr kundër vetë themeleve të Amerikës,” tha ai.
