Presidenti i Serbisë Aleksandër Vuçiç ka paralajmëruar se së shpejti do të mbahet një panair në kuadrin e nismës “Open Ballkan”, ku është përfshirë edhe Shqipëria.
“Jemi në pritje të një panairi të madh si pjesë e iniciativës Ballkani i Hapur – tha Vuçiç. – Do të jetë një ngjarje fantastike, një promovim i Serbisë dhe Beogradit si dhe i Shkupit dhe i Tiranës, i bashkimit tonë dhe qasjes së përbashkët ndaj së ardhmes.
Njoftimi u bë para mediave kur Presidenti i Republikës së Serbisë, Aleksandar Vuçiç, iu drejtuar qytetarëve lidhur me përbërjen e qeverisë së re serbe.
Mësohet se panairi që do të mbahet më 1 shtator do të jetë një prezantim i verërave, ushqimeve dhe kulturës nga 322 prezantues nga vendet anëtare të nismës.
Nisma “Ballkani i Hapur” e promovuar fuqimisht nga Kryeministri Edi Rama deri edhe personalisht, është veçanërisht e kritikuar nga kreu i Partisë Demokratike, Sali Berisha, i cili, përveç faktit se e sheh atë si aktin më të lartë të tradhtisë ndaj Kosovës, jo më larg se një javë më parë paralajmëroi për rreziqet ekonomike që i kanosen vendit:
“Hapja e doganave në kuadër të “Ballkanit të Hapur” – tha kreu demokrat, – do të shënojë masivisht falimentimin e fermave tona. Vetëm brenda një viti janë rritur me 250% importet e prodhimeve bujqësore nga Serbia. Në një kohë kur subvencionet aktuale dhe në dekada për fermerët e ish-Jugosllavisë kanë qenë qindra herë më të mëdha se ato thërrimet që mund të kenë marrë fermerët shqiptarë.”
