Kreu i Partisë së Lirië, Ilir Meta u shpreh se SPAK po keqpërdoret, duke folur për hetimin e nisur ndaj tij.
Në një intervistë televivizve, Meta tha se nuk ka kuriozitet për nisjen e hetimeve të SPAK-ut dhe nënvizoi se Prokuroria e Posaçme le të kërkojë kudo formularë për të.
“Unë kam qenë dhe jam gjithmonë ai që më njohin të gjithë. Nuk ka rëndësi kjo çështje, certifikata është bërë publike, në ndihmë të SPAK. Formularët të shkojë SPAK-u t’i kërkojë që nga çerdhja”, u shpreh Meta.
Ai shtoi se “Edi Rama i ka bërë shantazh SPAK-ut dhe e mban gjithë kohës në shantazh”. Meta u shtoi se “Edi Rama vjedhjet më të mëdha në Shqipëri, krimet më të mëdha në Shqipëri i ka bërë duke përdorur SHBA”.
“Ajo që ka filluar të ndodhë është e qartë, është një rikthim i shpresave, i aktivizimit të qytetarëve për të rifituar të drejtat që kanë humbur për shkak të një qeverie kriminalë. Kjo qeveri ka përzënë rreth 700 mijë shqiptarë. Energji e re për të vendosur shtetin ligjor dhe drejtësinë”, u shpreh Meta.
Ai nënvizoi më tej se Rama ka demotivuar të rinjtë dhe se në shtator ata (qeveria) do të shpartallohen. “Mezi po e presim shtatorin, tani jemi në një fushë do të e drejta e vërteta. Ata gjithmonë kanë stisus dhe do të shpikin. Ata gjithmonë janë mundur dhe këtë radhë do të shpartallohen. Nuk është një gropë, por është humnerë për ta”, tha ai.
Kryetari i Partisë së Lirisë tha se kishte hequr dorë nga padia për revistën austriake ‘Kronen Zeitung’ që e kishte akuzuar për lobim dhe korrupsion për arsye ekonimike. Meta tregoi se kompani që merren me çështjet e shpifjeve të mediave në Austri, e kishin sugjeruar të hiqte dorë pasi shpërblimi do të ishte shumë modest ndërsa shpenzimet kolosale.
“Kjo gjë m’u vlerësua e panevojshme nga kompanitë që merren me çështjet e shpifjeve të mediave në Austri. Gjyqi ishte i fituar, por sipas ligjeve austriake dëmshpërblimi do ishte modest, ndërkohë shpenzimet e gjyqit që mund të zgjaste pa fund, ishin shumë të mëdha. 300 euro ora për një studio ligjore. Ato që ka shkruar gazeta janë shpifje, nuk kemi ndërmend të harxhomë energji të kota. S’ka nevojë t’i kthej përgjigje, njihet si një gazetë që prodhon skandale. Heqja dorë nga padia ishte rekomandim i miqve të mi politikanë në Austri”, tha Meta.
Prokuroria e Posaçme ka nisur hetimet për ish-presidentin Ilir Meta. Pas publikimit në media të një shkrese drejtuar KQZ-së ku kërkonte formularin e vetdeklarimit për Metën, përmes një njoftimi, SPAK sqaroi dje se kërkesa është pjesë e hetimeve që po kryen Prokuroria e Posaçme në kuadër të procedimit penal regjistruar mbi bazën e kallëzimit të shtetasit Halit Valteri. Kallëzimi i këtij të fundit erdhi pas artikullit të medias austriake, që akuzonte Metën, e ndërsa ish-kreu i shtetit i cilësoi shpifje.
“Nisur nga interesimi i shumë gazetarëve pranë SPAK, lidhur me një kërkesë që spak i ka drejtuar KQZ, sqarojmë se ajo kërkesë është pjesë e hetimeve që po kryen Prokuroria e Posaçme në kuadër të procedimit penal regjistruar mbi bazën e kallëzimit të shtetasit Halit Valteri. Nuk kemi ndonjë informacion tjetër për të dhënë. Hetimet vazhdojnë”, thuhet në njoftimin e SPAK.
Në qershor të këtij viti, Vlateri paditi ish-presidentin me akuzën se gjatë kohës që ka qenë në pushtet ka përfituar para nëpërmjet korrupsionit dhe këto i ka përdorur për lobim.
Ndërkohë, Meta publikoi në FB dhe një shkresë që SPAK i ka dërguar gjendjes civile me firmën e Arben Krajës përmes së cilës kërkon informacion për gjeneralitetet e kreut të Partisë së Lirisë dhe e cilësoi “spurdhjaku i partisë”. “Meqënëse spurdhjaku i partisë ka vendosur t’i shërbejë hapur mafies së inceneratorëve në panik ju lutem njihuni edhe me një kërkesë tjetër serioze për karagjozët më të mëdhenj të Ramaformës. Shtatori po vjen dhe Drejtësia e Popullit nuk do ndalet më! Ramoviçin asgjë nuk e shpëton dot më”, shkroi Meta.
