Italianët, të cilët janë ende të hutuar nga stuhitë e forta që shkaktuan viktima, të plagosur dhe dëme të shumta materiale, duhet të përgatiten për një mot edhe më të keq me tornado, paralajmëruan sot autoritetet.
“Fatkeqësisht nuk ka mbaruar ende”, tha Luigi D’Angelo i Organizatës së Mbrojtjes Civile, në një koment për gazetën ”La Stampa”.
Stuhitë goditën Italinë Verilindore dhe Qendrore, mes shumë pjesëve të Evropës që kanë përjetuar mot ekstrem dhe nganjëherë vdekjeprurës që nga e mërkura.
”Ajri i ftohtë nga Evropa Veriore u përplas me ajrin e ngrohtë nga rajoni i Mesdheut duke shkaktuar rrebeshe të dendura”, sipas fizikanit dhe ekspertit klimatik, Antonio Navarra, i cituar nga gazeta ”Corriere della Sera”.
Italia tashmë shfaqet e ndarë në dy pjesë.
Ndërsa veriu dhe pjesët e Italisë Qendrore janë prekur nga stuhitë dhe shirat e dendur, zjarre të shumta në pyje dhe shkurre vazhdojnë të digjen në jug dhe në ishuj.
Brigadat e zjarrfikësve rreth Palermos u përballën gjatë natës me disa zjarre.
Erërat po ndihmojnë në përhapjen e flakëve.
Shumë prej zjarreve janë shkaktuar nga zjarrvënie apo pakujdesia njerëzore.
