Kryetari i Partisë së Lirisë, Ilir Meta tha se do ketë intensifikim të aksionit opozitar, ndërsa paralajmëroi edhe protesta gjatë një konference për mediat këtë të Mërkurë.
“Ne do bëjmë çdo gjë dhe është e qartë se çmimet do bien kur populli të ngrihet dhe do të ngrihet. Denoncimet janë bërë me prova dhe është në interesin e qytetarëve, do ndërmarrim alternativa, por edhe për indeksimin e pagave përmes një projektligji të ri, por edhe akteve të tjera dhe jemi shumë të qartë në objektivin tonë: Edi Rama, ai është kryeoligarku i Shqipërisë, të tjerët janë ogiçë, janë shërbëtorë të Edi Ramës”, tha Meta.
“Ora e ligjit po vjen, ora e qytetarëve të lirë që do ta vendosin këtë sistem të kalbur para drejtësisë po vjen dhe kjo nuk ndalet. Rritja e fuqisë investiguese, denoncuese, do të intensifikohet. Ndërkohë aksioni opozitar do jetë më i fuqishëm dhe dara do i ngushtohet (Edi Ramës)”, shtoi ish-kreu i shtetit.
Meta, teksa kujtoi uljen e çmimit të naftës në bursa, akuzoi qeverinë për vjedhje të qytetarëve përmes çmimit të lartë të naftës në vendin tonë. Ai kërkoi ulje të taksave mbi naftën.
