Kreu i PD, Sali Berisha, dhe ai i Partisë së Lirisë, ish-Presidenti Ilir Meta, duken të angazhuar plotësisht në aktivitete politike përgjatë muajit gusht.
Pothuajse çdo ditë Berisha dhe Meta janë të angazhuar në aktivitetet e tyre, takime me qytetarë, denoncime, apo ekspertë të fushave të ndryshme, dhe gjithçka duket se ka lidhje me atë çka pritet të ndodhë në vjeshtë, ku opozita ka paralajmëruar nisjen e valës së protestave kundër Qeverisë.
Meta pasditen e sotme do të jetë në Vlorë, në një takim me qytetarët në kuadër të organizimit të strukturave të Partisë së Lirisë. Në rrjetet sociale, ish-Presidenti njofton se do të japë mesazh për të gjithë vlonjatët e ndershëm e patriotë. Gjatë ditëve të fundit, drejtuesi i Partisë së Lirisë, ka zhvilluar takime në Tiranë dhe Durrës, nga ku ka hedhur akuza të forta në drejtim të Qeverisë dhe Kryeministrit Edi Rama, sikundër ka intensikuar denoncimin e atyre që i konsideron si skandale të regjimit të Ramës.
Në anën tjetër, kreu demokrat është angazhuar në takime me qytetarë apo ekspertë të fushave të ndryshme, nga ku bën premtime, por edhe denoncime lidhur me situatën që kalon vendi. Sot pasdite Berisha ka një takim me ekspertë të arsimit, lidhur me problemet në këtë fushë, ndërsa më parë ka zhvilluar takime lidhur me ekonominë, çmimet e karburanteve, energjinë, shpopullimin etj.
Si Meta dhe Berisha kanë vendosur që takimet t´i zhvillojnë në të njëjtën orë, 19:00, ndërsa lëvizjet e tyre synojnë angazhimin e sa më shumë qytetarëve, veçanërisht të rinjve në diskutime mbi problematikat që hidhen për debat e diskutim.
Motoja e takimeve të deritanishme ka qenë ajo që qytetarët duhet të marrin në dorë fatet e tyre, ku Meta ka hedhur idenë e referendumeve, si një e drejtë kushtetuese, ndërsa Berisha e ka mbështetur atë në reagimet publike.
