Ish-Presidenti Ilir Meta, drejtues i Partisë së Lirisë, deklaroi nga Vlora se betejat dhe luftën me atë që e konsideroi si regjimi i Edi Ramës, do i drejtojë vetë.
“Unë betejat dhe luftën e bëj vetë, nuk nxjerr askënd si të parë. Nuk kisha çfarë të bëja më parë, por sot që zbrita në fushë, luftën e bëj vetë me cilindo. Madje edhe flamurin atje do e ngul vetë i pari”, u shpreh Meta.
Ai theksoi se ka ikur koha kur opozita korruptohej, blihej e shitej, ndaj ne nuk do të bëjmë vetëm opozitë të fortë, por edhe qeverisje të fortë.
“Mos u habisni nëse zgjedhjet e përgjithshme do të bëhen përpara atyre vendore. E rëndësishme është që kauzat tona të fitojnë.Beteja me regjimin e korruptuar do të bëhet me anti-korrupsion”, tha Meta.
Ai shtoi se ne do të paraqitemi me ekipin më të mirë, madje këtu në Vlorë, do të punojmë fort, pasi e kam merak këtë qytet, do të zgjojmë ndjenjën e patriotizmit këtu.
“Nuk ka më kuptim kur njëherë na marrin Parkun e Butrintin dhe pastaj Portin e Durrësit. Shqiptarët duhet të reagojnë fort, mos presin që do rrijë njeri pa gjumë për të ardhmen e fëmijëve të tyre”, tha Meta.
