Kreu demokrat, Sali Berisha, gjatë takimit me ekspertë të arsimit dhe edukimit, tha se çdo problematikë e ka origjinën tek dhunimi i votës së lirë.
Berisha tha se dhunimi i votës e bën të pashpresë shoqërinë, ajo e pengon ndryshimin.
“Në historinë e demokracisë qeveritë kanë platforma të ndryshme. Atyre zgjedhësit u presin faturën sipas mendimeve, vlerësimeve që ato kanë, kurse kësaj qeverie që ka vendosur bandat, paratë e drogës, patronazhistët, kjo qeveri votën pothuajse e ka formalizuar. Ne dhe në diktaturë votonim çdo katër vjet, atëherë nga frika votonin për diktatorin, sot nuk ka rëndësi sepse e zgjidh ai me paratë e drogës, me patronazhistin”, tha Berisha.
Në vijim ai theksoi se ne Qeverisemi nga një grup hajnash.
“Ne qeverisemi sot nga një grup, më së paku hajnash, të cilët përdorin ndaj qytetarëve, ndaj mësuesve, ndaj mjekëve, inxhinierëve, fermerëve, fëmijëve, studentëve, dy armë, mashtrimin dhe vjedhjen, vjedhjen dhe mashtrimin. Unë dëgjova ju zoti Teferiçi, kur ju referuat Arben Ahmetajt. Është tragjike kur një mësues i respektuar, një drejtor shkolle përballet me një ministër hajdut që u largua nga Shqipëria si hajdut, u rikthye, u vendos dhe iku sërish si hajdut. Apo ju Daniela, përballeni me një mision më i rëndësishmi, misioni i numërimit të votave dhe administrimi i zgjedhjeve, në momentin kur ndodh ai, është më i rëndësishmi për kombin. Asnjë detyrë tjetër në vend nuk është më e rëndësishme se ajo dhe përballeni me një të ashtuquajturi politikan i cili nuk ishte gjë tjetër veçse një anëtar i bandës së rrezikshme të Elbasanit”, theksoi Berisha.
