Drejtuesit beratas kanë planifikuar që brenda kësaj jave të mbyllin kontratat me të gjithë futbollistët që do të përbëjnë Tomorin.
Kanë mbetur edhe katër firma për të përmbyllur skuadrën e sezonit të ri. Sipas trajnerit Arbëri, dy firmat e para kanë të bëjnë me kapitenin Çaço dhe mesfushorin Dobra.
Ndërsa drejt nënshkrimit janë edhe një portier dhe një sulmues, ku sipas gjasave ky i fundit mund të jetë i huaj.
Të dielën pasdite në Berat ka mbërritur për t’u testuar një sulmues brazilian, emri i të cilit do të bëhet i ditur gjatë seancës së sotme stërvitore.
“Për mua si trajner i Tomorit edhe dita e diel rezulton ditë pune, pasi sot (dje) kam pritur një sulmues brazilian të cilin do ta testoj së bashku gjatë javës. Gjithashtu kemi siguruar edhe një portier, i cili vjen nga një ekip i Superiores.
Rëndësi të veçantë merr fakti se këtë javë do të firmosë edhe kapiteni Çaço, të cilin e konsiderojmë si një nga shtyllat e ekipit. Kjo për arsye të eksperiencës dhe grintës që ai përcjell te futbollistët e tjerë.
Arsyet pse Çaço e ka shtyrë nënshkrimin janë objektive, por në fund rezultoi thjesht një formalitet dhe për këtë jemi të lumtur”, u shpreh trajneri Klodian Arbëri për “Panorama Sport”.
