“15 vjet më parë nisa heroinën, bashkë me shokët e mi të lagjes ku jetoj, pranë zonës së ish-bllokut. Atëherë isha 25-vjeç dhe kërkoja të mbushja boshllëqet e mia, pakënaqësitë duke përdorur drogë”.
Kështu nis të tregojë historinë e tij për Gazetasi.al 40-vjeçari me inicialet S.D nga Tirana.
Në këto 15 vite, ai tregon se ka tentuar të largohet nga droga por ka qenë e vështirë.
Me futjen e Metadonit, drogës sintetike në vendin tonë, përdoruesit e heroinës nisën të konsumonin dozat e përcaktuara nga ekspertët.
“Metadoni është drogë e fortë, por të paktën heqim varësinë nga heroina, nëse konsumojmë dozën e duhur”, thotë ai.
Për të nuk ka qenë e lehtë të largohet përgjithmonë nga drogat dhe Metadoni.
Sepse sa herë rifillonte heroinën, rikthehej po aq shpesh dhe në qendrën ku ishte regjistruar më parë për të marrë Metadon.
“Nuk është e lehtë. Në 15 vjet, vetëm 3 vjet kam qenë i pastër ku nuk kam konsumuar as heroinë dhe as Metadon. Gjithmonë shkëputesha dhe rikthehesha prapë te heroina “, thotë 40-vjeçari.
Hera më e fundit ishte një muaj më parë kur u takua me shoqen e gjimnazit që vinte nga Anglia, me të cilën konsumoi heroinë, jo me injektim.
“Nëse nuk kam Metadonin, e kam shumë kollaj të rikthehem te heroina. Krizat e abstinencës janë shumë të forta”, thotë i riu.
Në qendra s’ka Metadon
Prej mesit të korrikut, në 9 qendrat e trajtimit me Metadon, të hapura në rrethet Tiranë, Durrës, Elbasan, Korçë, Fier, Shkodër, Sarandë, Berat, Vlorë dhe në burgje ku ka më së shumti përdorues të heroinës, nuk ka furnizim.
Koordinatorët e disa qendrave i thanë Gazetasi.al se shkak është mungesa e furnizimit nga “Incomed”, depo farmaceutike shqiptare që është kontraktuar nga Ministria e Shëndetësisë për ta blerë Metadonin në Hungari.
Koordinatorët thonë se ndonëse ministria ka disbursuar buxhetin e siguruar nga donacionet e Global Fund për këtë kategori të përdoruesve të drogës, firma nuk ka respektuar kontratën duke lënë në mëshirë të fatit mbi 1 mijë persona.
“Pas alarmit tonë, ministria e Shëndetësisë ka siguruar në Maqedoninë e Veriut 200 litra metadon liquid por kjo sasi akoma nuk është shpërndarë në rrethe. Është e vështirë të ndash 200 litra në doza 10-160 mg sipas konvertimit që kemi bërë ne që t’ia përshtasim përdoruesve të Metadonit. Sot është 8 gusht, një muaj që ata nuk po trajtohen”, thonë koordinatorët e qendrave të Metadon.
Mungon stoku, ministria asnjë planifikim për Metadonin
Megjithëse një vend pranë nesh, Maqedonia e Veriut jo vetëm e prodhon vetë Metadonin por ajo është furnizuese e vendeve si Shqipëria që nuk sigurojnë blerje as për 1 mijë persona vulnerabël.
Ekspertët që merren me Metadonin thonë se brenda 3-4 ditëve mungesë metadoni, personat e qendrave kalojnë në krizat e varësisë dhe rruga e shkurtër është rikthimi tek heroina.
“Ministria duhet të krijojë stok me medikamentin e Metadon nëse duam ti japim shpresë të rinjve të lënë drogën. Fondet janë aty, ka shpenzuar Global Found. E vetmja gjë që duket se mungon është përgjegjshmëria “, thonë burimet për Gazetasi.al.
Personat që marrin metadon sa vijnë e shtohen ku vetëm në qendrën e Tiranë janë mbi 220 persona dhe 120 të tjerë janë në burgje.
Çdo ditë mungese është rikthim te vesi i vjetër, që i shkurton jetën dhe i afron vdekjen.
“Më dhimbsen të rinjtë. Në qendër kam parë 18-vjeçarë që kanë provuar më parë heroinën. Nuk e di çfarë po ndodh këtu por kur shohim dhe mungesën e vëmendjes së institucioneve, shtohet dëshpërimi dhe humbin shpresat që një ditë të jemi të pastër, si gjithë të tjerët”, mbyll rrëfimin 40-vjeçari nga Tirana. /GAzetaSi/
