Prej disa ditësh tashmë ka nisur mbledhja e firmës për peticionin e nisur nga qytetarët ku kërkohet dorëheqja e ministrit të Brendshëm Bledar Çuçi, ministres së Turizmit, Mirela Kumbaro dhe drejtorit të Përgjithshëm të Policisë së Shtetit, Gledis Nano.
Brenda 24 orëve, nga momenti i nisjes së procesit, mësohet se janë mbledhur 2 mijë firma në qytetin e Durrësit dhe Shkodrës si edhe ato të mbledhura online.
Kjo lëvizje e qytetarëve ka ardhur pas ngjarjes së rëndë të ndodhur në Himarë ku oficeri i policisë Arjan Tase goditi me skafin e tij një 7 vjeçare duke e lënë të vdekur në vend.
Vdekja tragjike e së miturës ngjalli reagime të shumta nga qytetarët sa i takon mungesës së sigurisë nëpër plazhe në kulmin e sezonit turistik. Pavarësisht protestave ku u kërkua dorëheqja e tre funksionarëve të lartë, kryeministri, Edi Rama duket se nuk e mori parasysh kërkesën e qytetarëve.
