Pavarësisht pritshmërive të larta, SPAK duket se nuk po ecën me atë që presin qytetarët për hetimin e çështjeve sensitive, përfshi atë të inceneratorëve, që konsiderohet si një nga aferat më të mëdha në Shqipëri.
Ish-Presidenti Ilir Meta, drejtues i Partisë së Lirisë, deklaroi së fundmi se SPAK po ecën si breshkat, ndërsa korrupsioni qeveritar si vrapi i një kanguri.
Në anën tjetër deputetë dhe drejtues të PD kanë deklaruar se SPAK nuk po heton aferën e inceneratorëve, ku sipas tyre janë të përfshirë nga Edi Rama, që cilvsohet si koka e “grupit kriminal” te Erion Veliaj dhe Engjëll Agaçi, i pari kryebashkiak dhe tjetri Sekretar i Përgjithshëm i Këshillit të Ministrave.
Arben Kraja, kreu i SPAK, ka deklaruar se çështja e inceneratorëve është shumë komplekse, por do të hetohet deri në fund, ndërsa ka theksuar se Prokuroria Speciale vepron mbi prova dhe fakte dhe jo mbi agjendat e politikës.
Në anën tjetër, SPAK, por edhe ambasadorja amerikane e akredituar në Tiranë, Yuri Kim, kanë konsideruar si sukses hetimor sekuestrimin e gati 70 milion euro asete pasurore që i përkisnin krimit të organizuar.
Kundrejt kësaj panorame, Kuvendi i Shqipërisë, atje ku Kraja pak javë më parë paraqiti edhe raportin vjetor të SPAK, ka miratuar një rezolutë, përmes të cilës i kërkon Prokurorisë Speciale, të sekuestrojë pasuritë e zyrtarëve të lartë që dyshohet se janë të korruptuar.
Gjithashtu, SPAK i kërkohet që të forcojë luftën kundër korrupsionit përmes ndjekjes penale, sekuestrimin dhe konfiskimin dhe ndjekjen penale që rezultojnë të lidhura me korrupsionin si dhe të zbatohen standartet më të mira në drejtim të garantimit dhe të drejtave të njeriut në procedimet penale, të së drejtës për proces të rregullt dhe barazisë së shtetasve përparimit ligjit dhe parimit të propocionalitetit , parimi të ligjshmërisë dhe objektivitetit dhe paanshmërisë .
Kuvendi po ashtu kërkon që të zbatohen parimet e ligjit, për funksionimin efikas të sektorëve të dokumentacionit dhe gjithashtu për hetimin financiar pranë Prokurorisë së Posaçme, ku shërbimet gjyqësore pranë BKH duhet të kenë shërbime edhe jashtë Tiranës. Kërkohet po ashtu cilësi dhe shpejtësi në hetime.
Dhe duke kujtuar pritshmëritë e qytetarëve nga njëra anë dhe të ndërkombëtarëve nga ana tjetër, Kuvendi kërkon hetime proaktive ndaj zyrtarëve të nivelit të lartë dhe sidomos për çështje me interes dhe impact të lartë publik.
