Nisi dje nga Shkodra mbledhja e firmave për peticionin që do t’i kërkojë kryeministrit Rama shkarkimin e ministrit të Brendshëm, Bledi Çuçi dhe ministres së Mjedisit e Turizmit, Mirela Kumbaro.
Aktivistja Eliona Shkreli tha se në qyetin verior u mblodhën rreth 405 firma vetëm ditën e djeshme.
Ajo u shpreh se pritshmëritë janë që në të gjithë vendin të mblidhen 50 mijë firma për shkarkimin e ministrave.
“Filloi në Shkodër, nesër do jemi edhe në Velipojë. Ka filluar sot në Durrës, do të fillojë në Tiranë. Do të shtrihet kjo nismë në të gjitha bashkitë e vendit. Më ka bërë përshtypje në Shkodër, sepse nuk e prisja të kishte aq shumë, se kemi marrë diku te 405 firma vetëm ditën e djeshme.
Kishte sidomos shumë emigrantë shqiptarë që kishin ardhur nga Italia. Peticioni është edhe online. Në pritshmëritë tona nuk diskutohet 50 mijë firma, mund të jetë edhe më shumë. Në Shkodër, duke parë këtë interes, beesoj me mbi 3-4 mijë firma”, u shpreh ajo.
Dy ministrat, Çuçi dhe Kumbaro akuzohen nga protestuesit se kanë përgjegjësi morale për ngjarjen tragjike ku humbi jetën 7-vjeçarja, Jonada Avdia dhe bashkë me drejtorin e policisë, Gledis Nano, do duhet të japin dorëheqjen.
Peticioni u njoftua të hënën në fund të protestës së dytë dhe pasi të plotësohet firmat e nevojshme do të dërgohen në kryeministri.
